نفسي

نفسي أعيش في بيت في الريف، الريف اللي بنشوفه في الأفلام الأجنبية

ويكون عندي بسكليت، أروح فيه لكل مكان، ويكون كل شي بدي إياه قريب علي ولو بدي إشي من المدينة بروح مشوار خاص، بالباص

ويكون عندي بيت خشب من اللي سقفهم على شكل متلت، وإلو مدخنة وشباك في السقف زي اللي كانت تهرب منه جودي أبوت

ويكون إلو حديقة كبيرة إلها سور مش كتير عالي ويكون فيها بطة وحصان

وجيران بزورهم وبزوروني وبنطلع مشاوير وبنسهر مع بعض

وغرفة قعدة فيها تلفزيون قديم ومكتبة كبيرة ومعلق فيها لوحات كتير

وبرندة صغيرة عليها كرسي هزاز أقعد عليها بالليل وأسمع صوت الصراصير بدون ما أشوفها

ويكون عليها طاولة صغيرة عليها ورق واقلام دايما وأقعد أكتب عليها الصبح

وأكون زارعة في الحديقة بندورة وفراولة

ويكون عندي خزانة في المطبخ فيها كل أنواع الشاي

وأكون أعرف أطبخ، عشان كل كم يوم أدخل عالمطبخ وأنا رايقة وأعمل إشي زاكي وأودي للجيران

ما بدي أهرب من الواقع، بدي يكون هاد الواقع. واقع أبسط، شكله وهيئته أبسط بس مليان تفاصيل معقدة وحلوة بنفس الوقت…0

About these ads