احتفالاً بالمسلسلات العربية…

احتفالاً بالمسلسلات العربية…

Sunday, September 20, 2009

كل عام وإنتوا بخير

خلص رمضان، ضيف كريم مر بسرعة السحاب واستقبلنا بعديه العيد وبشاير الشتا… طبعاً بس رمضان بنسمع حكي كتير عن المواظبة على العبادات و عمل الخير حتى بعد رمضان وعن العيد وشو بدنا نعمل في العيد وشوال وصيام الستة أيام وأشياء تانية كتير، بس طبعاً نهاية رمضان يعني كمان نهاية موسم حافل من المسلسلات العربية والمنافسة بين الفضائيات العربية والمحطات التلفزيونية…

شخصياً، ما تابعت أي مسلسل كامل، يعني المسلسل الوحيد اللي تابعته ونيس لأني بحبه من زمان وإلو ذكريات، أما باقي المسلسلات فكان إلي الشرف والسرور إني شفت بعض الحلقات أو اللقطات منها وبصراحة يعني إشي بفرح، وما أعنيه بكلمة بفرح هنا أي برفع الضغط وبجيب الجلطة…

بصراحة مش عارفة من وين بدي أبدا، لأنه صار في إبداع خيالي في التمثيل الفاشل والأوفر والحوارات الركيكة، سواء كانت مسلسلات أردنية أو سورية أو خليجية، عشان هيك خلينا نخالف المثل الشعبي ونقول عن زيتنا عكر ونبدأ بالمسلسلات الأردنية، ما هي خربانة حربانة…

مشهد عروس وعريس بعد الزفاف، المفروض مشهد رومانسي وأعطيني عطواحيني، بس بما إنه مسلسل أردني فحتى العروس ليلة عرسها لازم تكون دواوين، ويتضح هذا من خلال الحوار التالي، ويا ريت ضعاف القلوب والحوامل ما يكملوا عشان الرومانسية اللي بتذبح:

العريس: ارحميني، أنا بشر من لحم ودم

العروس: ليش إحنا بالمسلخ

العريس: وخفة دم كمان!

خفة دم!!! بقولك خفة دم! ألطم يا واد؟ ألطم يقولوا الولية اتجننت؟ أنا بقول لو حكالها: سنحك ما أنغشك كان أزبط للموقف، بعدين هي بتقوم بتطلع موس كباس وبتعلم عليه… هيك بكمل المشهد

والإشي التاني اللي بسطح إنه لما تشوف المسلسلات الأجنبية بكون الممثلين الكومبارس اللي بمثلوا أدوار ناس مارقين في الشارع بعرفوا يمثلوا زي أبطال المسلسل، ويعني لما يمرق واحد بعرفش يمثل بتحس في إشي غريب إنه كيف جايببنه؟ بينما في المسلسلات العربية، حدث ولا حرج، بتلاقي واحد ماخد دور رئيسي وبسمع الحوار كإنه ولد في الصف الخامس بسمع أنشودة المحفوظات، يعني امبارح عم بحضر حلقة من مسلسل خليجي إنس مش قادرة أضل ساكتة! إنه مغلبين حالكم وعاملين مسلسل وأبصر قديش صارفين عليه جيبوا ممثلين زي العالم!

ومن الأشياء اللي بتضحك اللي لاحظتها كثرة المشاهد اللي بحكي فيها الممثل في عقله، بحطلك الممثل قاعد مع حاله أو حتى مع الناس ومرات بكون بهز براسه وبعمل حركات غريبة وهو بحكي في عقله واحنا سامعين كل شي، طيب حتى الواحد لما يفكر ما بكون بهز في راسه هيك! وأحلى إشي لما تكون وحده بتبكي وهي بتفكر، بطلع صوت البكا مع الحكي، كيف يعني؟ في حدا ببكي في عقله؟

بعدين كله كوم والمكياج في المسلسلات الكويتية كوم تاني، طيب ما حدا عمرو حكالهم إنه لما تكون واحدة قاعدة في بيتها ولابسة بجامة وحاطة طن روج أحمر على شفايفها وكحلة كمان شوي بدها توصل لدنيها بكون المشهد مش طبيعي أبداً؟ بلاش، خلينا نفترض إنه في ناس بحبو المكياج هيك 24 ساعة وحتى وهم نايمين، طيب ما حدا قلهم إنه مش منظر؟ يا عمي عن جد بشع، كتير بشع! يعني الواحد بستحي لما يشوف الأجانب بحطوا مكياج خفيف وبطلعوا أحلى ستين مرة من الممثلات العربيات اللي بطرشوا حالهم طراشة، كإنه الواحدة بتفيق من النوم بتغطس بسطل أملشن وبتطلع…

طيب بلاش المسلسلات الأردنية والخليجية، خلينا نحكي شوي عن المسلسلات السورية والمصرية اللي هم المفروض رواد الدراما في العالم العربي، ما بعرف شو اللي صاير إنه التمثيل المبالغ فيه زايد هاليومين، كإنه بدهم يضحكوا الناس أو يثيروا مشاعرهم بالعافية،  زي شخصية أبو بدر في مسلسل باب الحارة، يعني مش هيك، زنخت، إنه واحد على البركة وفيه وشة أو أي إشي بس مش لها الدرجة، والمفروض الناس يعتبروه الشخصية الكوميدية في المسلسل، وفي المقابل شخصية أبو حاتم اللي عاملينه أبو زيد زمانه، بتحسوا حتى وهو بحكي مع مرته وبناته بتخن صوته زي اللي بطوشة، مش هيك يعني… وبنرجع كمان لحركات الراس وهم بحكوا، في حدا وهو بحكي بضل يهز راسه؟ ليش؟ ليش؟

وفي كمان ظاهرة الشخصية الضحية البريئة اللي كل الناس بحبوها أو ظالمينها أو أو أو… زي مسلسلات يسرا، بتكون هي أحسن وحدة في الدنيا وحوليها مجموعة من الأوغاد اللي يا إما بدهم يتجوزوها يا إما بدهم إياها تدخل السجن أو تنعدم، وهاي الظاهرة مش في المسلسلات المصرية بس برضه في مسلسلات تانية زي المسلسلات الخليجية اللي بكون المسلسل فيها على اسم الشخصية الرئيسية في المسلسل…

كان في بالي حكي كتير بس هادا اللي متذكرته حالياً، على أي حال للموضوع بقية إن شاء الله بركي رجعنا نشوف مسلسلات بمستوى الجوارح أو التغريبة الفلسطينية بدل هالـ… خلينا ساكتين!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s