يعني هو لا يمل… بس قزينا بصراحة

يعني هو لا يمل… بس قزينا بصراحة

Tuesday, August 11, 2009

في أشياء في الحياة ممكن الواحد يستوعبها، إنه هي بتصفي بالآخر زي ما تقولوا هيك قزز بس برضه الواحد بقدر يتعايش معها لدرجة معينة، يعني مثلاً بتخيل إنه كل واحد فينا سواء كان مشترك مع فاستلينك اللي صاروا يحكولها زين أو موبايلكم اللي تحولت لأورانج أو أمنية اللي طلعتلهم بالسحبة، كلنا كمواطنين أردنيين على اختلاف أسمائنا وأشكالنا وألواننا وأعراقنا وانتماءاتنا وعقدنا النفسية كلنا بجمعنا شيء واحد، وهو إنك بتكون قاعد في حالك لا إلك ولا عليك، ويمكن تكون بتستنى مسج مهم، وفجأة برن موبايلك، ون مسج ريسيفد يعني، بتقوم بتنط ويمكن تطلع من الحمام بسرعة لأنك مستني المسج صارلك ساعتين وأول ما تكبس “أوبن” يكون هول المفاجأة إنه المسج من رقم غريب، ومش رقم عادي إنه يضل عندك أمل وتقول شكلو عفاف معهاش كريديت، لأ! رقم مكون من 4 خانات، ومكتوب فيها: لتحميل أغاني عمر العبدللات اتصل على الرقم xxxx

طيب ماشي، تجميل رنات وأغاني ومش عارف شو صحيح بالنسبة إلي شخصياً حكي فاضي في الأغلب بس يعني ممكن الواحد يستوعبه، حتى في أشياء تانية تافهة أو مش تافهة والواحد بفهم إنه ماشي الواحد بستوعبها، يعني ممكن يقولك أخبار أو رياضة أو معاني أسماء أو حدث في مثل هذا اليوم أو حتى أبراج وهبل، كله متعودين عليه، بس إنه توصلني مسج تقول: النصائح الذهبية للحصول على عريس، هاي بصراحة ما مرت علي قبل هيك!  طبعاً من باب حب الاطلاع وأنا بكتب هادا البوست بعتت أشوف شو طبيعة هاي النصائح…

عن جد يعني خلينا نفكر في المنطق، لما وحدة يكون كتير جاي عبالها تتجوز ويوصل فيها اليأس لدرجة إنه تستعين بخدمة تلفونية معروف وواضح إنه الهدف منها لم المصاري، لأنه ما أظن إنه اللي بعملوا هاي الخدمات مصدقين عن جد إنهم رح يحلوا مشكلة العنوسة والزواج غير المتكافىء في البلد لما يبعتوا مسج بتقول مثلاً: لا تجلسي في بيتك منتظرة فارس أحلامك بل ابحثي عنه ليجدك

عن جد؟ لأ يعني عن جد عن جد؟

الموضوع مش موضوع عريس او أغاني تامر حسني أو صور ميرنا وخليل، المسألة مسألة قديش صاير في استخفاف في عقل المواطن حتى إنه صاروا يشوفوا صراف آلي يسحبوا منه مصاري بأي طريقة، بقرة يحلبوها تطلع ليرات أو بطة بتبيض دهب إذا سمعتها أغنية لعمرو دياب، يعني فهمنا ثورة اتصالات ومش عارف شو بس بالعقل… قززتونا!

المهم، لما بعتت لخدمة عريس الغفلة أشوف شو قصتها عملولي اشتراك فيها، إذا أي حدا عنده فكرة كيف ممكن ألغي الاشتراك بدون ما أحرج حالي وأتصل بأورانج وأقولهم إني اشتركت بخدمة العرسان يا ريت تفيدوني… أو ممكن أقولهم خلص لقيت اللي بدي إياه،  إلغي! يعطيكم العافية…