سوبرمان الأردن

 اليوم سمعت قصة، هي قصة مألوفة بنسمع زيها كتير، بس كان فيها إشي لفت انتباهي… ش

 هادا يا جماعة الخير ابن خالي كان رايح يشتري سندويشة فلافل، وهو مروح رجع بسيارته ريفيرس (أو ليفيرس، لزوم الأسلوب السردي) ولا هو خبط بمراية بكب غاز. المهم وبلا طول سيرة نزل الشوفير وكلمة من هون وكلمة من هون دقوا في بعض وانتهى الأمر بمشكلة طويلة عريضة أدت إلى إصابات سطحية وتكسير زجاج السيارة.ش

 طبعاً هاي قصة بنسمع زيها كتير، بس بصراحة اللي لفت انتباهي حركة عملها شوفير بكب الغاز، اللي زي ما فهمت زلمة سرسري دخلة السجن عنده زي الروحة عالصويفية، يعني مش دواوين إلا شوي، حكي فاضي… اللي عمله الشخص المذكور هو إنه لما بدا الجدال بينهم قام بفتح قميصه على مصراعيه، زي لما سوبرمان يفتح قميصه، لكن بدل ان يظهر حرف “إس” كبير ظهرت كمية لا بأس بها من الأوشام على صدره كأنه يقول “أنا كان عندي سن اسمه جويدة وخلعته زمان”ش

 فأنا صرت أفكر، لو هادا الشب يطبع حرف “دي” كبير على صدره (من كلمة دواوين) ممكن نعمل مسلسل مبتكر بدل هالمصايب اللي بنشوفها عالتلفزيون الأردني… وبصير عنا سوبرمان أردني خاص فينا ! بس بعد ما راجعت الفكرة لقيت إنه فعلاً في عنا سوبرمانات كتير في الأردن، بس مش زي سوبرمان اللي بنعرفو

 سوبرمان الأردني هو الشخص الذي تجد هاتفه يرن كلما كانت هناك طوشة أو بشائر طوشة، يعني بكل عرس إلو قرص وبكل طنة إلو رنة، ووين ما فيه ناس بتدبح بعض بتلاقي دابب عالموت…ش

 أنا بصراحة بعرف نموذج من نماذج سوبرمان المذكور أعلاه، وهو شاب في العيلة، بتشوفه من برة بتقول ما شاء الله، طالب جامعي مرتب أنيق وسيم  بفهم ومثقف ومتكلم ممتاز وعلى كيف كيفكم، بس معروف لما حدا ييجي فيك بترفع عليه خط بيجي وبجيبلك الناساللي هم…ش

 مثلاً، مرة من المرات عرف إنه شباب مدرسة خاصة قريبة من بينهم بعاكسوا أخته وهي رايحة عالمدرسة، راح تاني يوم على ساحة المدرسة وارتكب مذبحة، تخيلوا شخص واحد على طلاب مدرسة الله أعلم كم عددهم، شلح الحزام ونزل فيهم من وين بوجعكم. ومش بس يك، تاني يوم رجع عالمدرسة ودخل دخول المنتصرين، وكانوا الطلاب المشطبين واقفين عشان يعتذروله… ش

قبل فترة كان يوصفلي ملحمة شارك فيها استمرت من الساعة 8 للساعة 2 بالليل. بقول حكو معاه ناس صحابه عشان في طوشة كانت عم تتحضر، ولما راحوا عالمكان المحدد، حسب ما بقول، كان في جيش كامل بستناهم، حتى إنهم كانوا حاملين سيوف وواحد فيهم حامل منجل، بقولي كان المنظر بخوف سيوف بتلمع وأعداد مهولة من البشر، معركة بكل معنى الكلمة! طبعاً هو وصحابه خف عقلهم بس برضه ما تراجعوا وانتهت الطوشة بأضرار مادية وجسمية متعددة على الطرفين

ومن أكتر القصص اللي ضحكتن لما قالي عن واحد تمشكل مع والد السوبرمان المذكور، الزلمة المسكين ما عرف إنه وقعته سودة منيلة بستين نيلة! لأنه العيلة كلها سوبرمانات من كبيرها لصغيرها، وبس سمعوا صوت أبوه نزلوا الأعمام واولاد الأعمام اللي كانوا متواجدين بالقرب من مكان الواقعة زي السيل العارم، أبوك يالموت! والباقي عندكم

بس السوبرمانات مش دايماً بستخدموا العنف. مرة صارت عنا طوشة في الإسكان، نزلوا جيش من إسكان تاني وما كان في غير أخوي وأكم من واحد من صحابه وكانوا صغار لسا في المدرسة، طبعاً خف عقلهم رسمي، إنه شو بدنا نعمل؟ قام واحد فيهم راح جاب أخوه الكبير، وإجالك بهالمرسيدس ووقف قدام الجيش ونزل وقال: “بديش أشوف ولا (تووووووووووت) في الإسكان” وزي السحر! فجأة كل الجيش اللي كان جاي يكسر الدنيا انسحب مع الاعتذار كمان! طب كيف؟ ليش؟

هلأ صحيح هاي القصص بس الوحد يسمعها بتكون بتضحك، بس زي ما بقولوا، شر البلية ما يضحك، وهادا هو شر البلية، مشاكل بتتحول لمواجهات عنيفة بين الشباب عشان قصص تافهة، مش عارفة هو من فضاوة الشباب ولا من المفهوم المشوه للزلومية اللي عنا، ولما نضحك بالقصة بكون لأنها انتهت بدون ما حدا يموت أو تصيبه عاهة مستديمة، بس مش هاي الحالة دايماً، لأنه في قصص كتير عن ناس ماتوا أو تشوهوا بسبب طوش من هاد النوع، زي طالب التوجيهي اللي دخل المستشفى وكان بدو يموت بسبب شباب متهورين طايشين ما بحسبوا حساب العواقب اللي ممكن تنتج من رغبتهم الصبيانية في إثبات رجولتهم وتعزيز كبرياءهم

أنا شخصياً حسيت بجدية الموضوع لما إخواني تعرضوا لموقف زي هيك، تهجموا عليهم شلة زعران وهم بالسيارة واللي جنني وخلاني أعدم عقلي إنهم كانوا بدهم يضربوا أخوي الصغير اللي كان عمره وقتها 12 سنة وكان قاعد وخايف في السيارة مالوش دخل في إشي، ولا إنه والحمد لله قدر أخوي يشغل السيارة ويهرب والأبواب مفتوحين. وهدول البهايم طبعاً نزلوا ضرب بالعصي على السيارة اللي كنت شاريتها قبل شهرين وتسببولها بأول طعجة، بس طعجة السيارة مش مشكلة قدام فكرة إنهم كان ممكن يتسببوا في عاهة لواحد من إخواني. طبعاً أخوي كانت ردة فعله الأولى إنه حكى مع صحابه السوبرمانات وكان بدو يطلع يدور عالبهايم عشان يرد اعتباره، بس بعد تفكير وتعقيل من أهلي سكرنا الموضوع واكتفينا بتبليغ الشرطة بأوصافهم

اللي بقوله إنه لما الشاب يفور دمه ويعمل فيها أبو زيد الهلالي، وقبل ما يطول الشفرة من تمه ولا الموس من كندرته، يفكر إنه ممكن يخسر حياته او تصيبه عاهة تضل معاه طول حياته عشان حكي فاضي، أو ممكن يتسبب في عاهة لشخص تاني أو حتى يتسبب في قتله ويخسر عمره في السجن او يقضي عمره عايش مع الشعور بالذنب، أو حتى ممكن تاخد إيدو عالموضوع ويصير مجرم… الاحتمالات كتيرة

الكل بدو يصير سوبرمان والكل بدو يثبت إنه زلمة، بس اسألوا أي واحد كان في يوم من الأيام سوبرمان دمه فاير عالطالعة والنازلة، وأظن إنه لما يبدا يحكيلكم قصة من قصصه رح يبدا بجملة: “لما كنت ولد” ش

9 responses

  1. انا ابن خالي – اللي دايما بشارك بتعليقات ثورية – عندو معارف كثير سوبرمانات…بس مش عشان طوش..لانو ابن خالي شاطر بالحكي والمزح والسوبرمانات بحبوه !! حكالي عن شخصيت “مشهورة” بعرفها..واحد اسموا جودة وواحد اسمو ابو ردين…ماعلينا

    الله يهدي الشباب ويشغلوا حالهم بشيء الو معنى…في كتير ناس راحت من ورا المراجل الفارطة هاي

  2. konet met2aked ino 7ala2e abed here….
    Ola Idafa 3azeema lal Thawra…we mostala7 el supermanat…mesh 2ader 2a3aber…bidi ajeebhom kolhom 3ala Gaza…we need zo3ran !!

    Jameel el post…we Allah Yes7le7 el zo3ran !😀

  3. dude seriously…. kol wa7ad shab lazem ykoon bi3rafloo wa7ad min il supermannaat taba3oon il 3ileh ya3ni mathalaaan ana 3indi wa7ad bishtagel 3ind aboi ismoo abu ra3ed all y6awel bi3omroo ou 3indi garabeh b3eedeh min il 3aileh ya3ni dayman hadool shayelhom la moshkileh kbeereh … bas waget il jad il wa7ad brin 3ala il soqooor sa7aab ou il bagi 3indkom !

    bas il moshkileh iza 7akait ma3hom ou jibthom 3ala 3abdoun … ya 7abeeby aw ya 7adiddddy zay ma bigolooo ya3ni saif thooo 7adain hathaaa😛
    momken iza ma lagooo hoosheh yiblashooo bil 3alam il ma3ak😛
    bas ya3ni hada shar la bod minooo !

  4. هع هع هع هع … انا كنت بمدونة شعراوي فاكان كاتب عن مدونتك دخلت اشوفها , وعجبني هل موضوع , على اعتبار انو انا ساكن بكوكب سوبرمان ( الزرقاء ) ولكربتونايت مش موجود فا السوبرمانات معبين الدنيا عنا , مرة صارمعي مشكله مع 5 اشخاص فا حكيت مع سوبرمان اخوي انو تعال , اخوي حكا مع سوبرماناتو وخلال 5 دقايق ( يعني لو الشرطه ما بلتمو بهيك سرعه ) كان جاي 35 واحد وللاسف فوجئت انهم هدول طلائع القوات وصرت انا الوسيط لفك الحصار واطلاق اسرى المعتدين … الله يبعدنا عن الدوواين بس توووووووت تووووووووووت توت توت توت توتو تو على هيك تفكير

    مدونة جميله

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s