هم البنات… للممات

التمييز بين الاولاد والبنات في ثقافتنا العربية، وحتى في ثقافات تانية، إشي موجود ومعروف من زمان. طبعاً هو موروث جاهلي وتخلف من نوع خاص، بس يا ترى ليش لساته مستمر في أيامنا حتى بين ناس متعلمين ومثقفين؟ هل هو عادات جاهلية بحتة أم طبيعة بشرية؟ وليش لحد هلأ بنسمع عبارات زي: الله يعوض عليكي (لما وحدة تجيب بنت) أو عقبال ما تزينيها بالولد؟

يعني مثلاً قبل فترة سمعت عن دكتور خلا مرته تجهض عشان كانت حامل ببنت، ودكتور تاني كان يستخدم طريقة معينة للتحكم بجنس الجنين عشان يجيب اولاد حتى صار عنده 4 أولاد. هلا الله أعلم إذا كانت الطريقة هي فعلاً السبب بس الفكرة في إنه حاول من الأساس. وأنا بستغرب من زوجاتهم، إنه إنت كيف بتقبلي على حالك هيك إشي؟ ما بتحسي بالإهانة؟

المهم، نرجع للسؤال: ليش بعض الناس بحبو يجيبوا اولاد أكتر من البنات؟ خلينا نستكشف الأسباب

عشان يحمل اسم العيلة

مع احترامي لكل العائلات، بش شو يعني اسم العيلة؟ هل هو مجرد اسم بدنا نخليه متوارث بدون معنى؟ اللي بحمل اسم العيلة وبرفعه هو الأعمال الكويسة اللي بعملها أفرادها سواءً كانوا رجال أو نساء، وهاد سبب من الأسباب اللي عشانها بعتقد شخصياً إنه البنت لما تتجوز لازم تحتفظ باسم عيلتها، لانه حتى لما تتزوج المرأة بضل إلها كيانها وشخصيتها المستقلة واسم عيلة ربتها وإلها حق عليها.

عشان يحمل اسم أبوه

نفس الإشي. يعني إذا بسمع واحد اسمه أحمد حامد، شو بعرفني مين حامد بلا صغرة؟ وطبعاً راس مالو جيلين تلاتة وبنمحي ذكر حامد من الأرض، والإشي اللي ممكن يخلي ذكره موجود هو الأشياء المنيحة اللي عملها في حياته، وياما علماء كبار من أعلام الإنسانية اللي امتد ذكرهم لقرون من الزمن ما جابوا ولاد، وأكبر مثل يمكن نعطيه هو الرسول صلى الله عليه وسلم، كل اولاده الذكور ماتوا وهم صغار ومع ذلك ذكره باقي إلى يوم الدين

عشان يكون عزوة

صحيح حلو يكون في إخوان شباب في البيت، هادا إشي ما حدا بنكره، بس في نفس الوقت وخصوصاص هالأيام البنات صاروا عزوة كمان، بساعدوا أهلهم وبتعلموا وبشتغلوا وياما في بنات الوحدة فيهم بتسوى 10 شباب!

عشان هم البنات للممات

أظن كلنا بنعرف هاي العبارة! طبعاً ممكن ناس يحكوها من باب إنه البنت بتجيب العار أو إنه بحسن نية من باب إنه الأهل دائماً بخافوا على البنت، بس إن جينا للواقع، البنت والشب لازم ينخاف عليهم في هالزمن، ولا تنسوا إنه الشباب بوخدوا حرية أكبر في كتير من الأحيان يعني بكونوا معرضين أكتر للانحراف والانحلال والمخدرات وما إلى ذلك. هلا بديش أقلبها دراما، بس الواحد بدل ما يخاف ويقعد يضرب أمثال من سنة الخشبة أحسنله يربي ولاده منيح سواء كانوا بنات ولا شباب، ويتوكل على الله. وطبعاص كلنا بتعرف الازدواجية اللي بتصير في البيوت نتيجة هاي الأفكار، بتلاقي الام بتتفاخر  بأنه ابنها عند 600 صاحبة وليل نهار بطق حنك مع البنات عالتلفون، بس إذا مسكت بنتها بتحكي عالتلفون مع شب بتمصع رقبتها، أما بنات الناس عادي، ابنها وهو حر!

عشان أهل الزوج بنقوا بدهم ولد

وما ينقوا ولا ينفلقوا، حياتكم ولا حياتهم؟ ولادكم ولا ولادهم؟

بصراحة أنا السبب الوحيد اللي ممكن يدخل مخي إنه واحد يكون بده ولد هو إنه يكون بده يعلمه كرة قدم ويلعب معاه مصارعة، زي لما تكون وحدة بدها بنت عشان تلبسها فساتين وتاخدها معها وين ما تروح وتكبر معها كإنها صاحبيتها. هادا عادي، مين ما بحب هاد الإشي؟ وبصراحة أنا مرات بكون عندي شوية عنصرية في إني بحب البنات الصغار الكتير، يا عمي حلوين! تخيلوا بيت في 3 أو 4 بنات صغار… بس في النهاية الواحد ما بصير يميز سواء الولد على البنت أو البنت على الولد، ولو قلبه مال لحدا من اولاده أكتر من التانيين لازم ما يخلي هادا الإشي يأثر على معاملته إلهم ولا يحسسهم فيه

وفي النهاية، كلنا بنعرف الحديث النبوي المعروف “اعدلوا بين أبنائكم، اعدلوا بين أبنائكم، اعدلوا بين أبنائكم” (صحيح) وفي حديث تاني أنا اول مرة بسمعه، وهو أن الرسول صلى الله عليه وسلم قال: (سووا بين أولادكم في العطية، لو كنت مفضلاً أحداً لفضلت النساء) حسن، وحديث: “من ولدت له ابنة فلم يئدها ولم يهنها ولم يؤثر ولده عليها (يعني الذكور) أدخله الله الجنة (رواه ابن عباس) و

بعد كل هاد، برجع بسأل، ممكن في حدا يضل بده ولد عشان يحمل اسمه؟

13 responses

  1. مش موافق….أنا ماعندي هذا التفكير….

    بس بيني وبينك…نعم موجود…..بنت عاقلة أحسن من ميت ولد عديم فائدة ومشكلي مثل فخري ابن ابو فخري

  2. ها هاها … تعرفي؟ مرات كتير النسوان هم اللي بحبو الولاد اكتر. وما بدهم يخلفو الا اولاد. يمكن علشان البنات بيتعذبوا في حياتهم كتير.. الله اعلم

    بس انا بوافقك في الرأي مافي شي بالدنيا احلى من البنات الصغار.. يسعدهم

  3. I second Qwaider! Women prefer males as a son and brother as well!

    I still remember my mother telling her bro that she loves her bros more than sisters! The problem is that she suffered from her mother’s discrimination between males and females!

  4. Pingback: أصوات أردنية حرة: فيضانات مباشرة…تمييز بين الذكر و الأنثى …وحال الحاسوب في الاردن | 7iber Dot Com

  5. انا لهلأ مش عارف سبب هدا الحكي
    يعني الاسباب اللي كانت تخلي الناس يحكو هيك في الجاهلية كلها مش موجودة
    لكن القفزة الحضارية و الثقافية والتكنولوجية اللي صارت عنا صارت فجأة
    فما صار معها أي تغير في العقلية,بل العكس انا شايف انه التخلف كل مالو عم يزيد عنا للأسف
    وما في دليل اكبر من جرائم الشرف اللي بتصير, و الاشياء اللي لا ترقى إلى قتل البنت بس منشوفها او منسمعها
    الله بيعين

  6. Yes, sometimes women prefer to have sons because people won’t leave them alone until they do! It’s a societal thing I think!

    Nido: I like the saying😀

  7. اتفق معك ، أنا عندي بنتين ما عندي أولاد ، والله عندي اياهم في الدنيا و مافيها ، كل انسان بحكيلي الله يعوض عليك بفهمه إنو جاهل و كلامه غلط

  8. و الله شخصيا ً أنا كنت بتمنى يكون عندي بنات و بس! و الحمد لله أول شي إجتنا بنت و بصراحة بتمنى إلى الآن خلفتنا تكون بنات.🙂
    يمكن لأنو عائلتنا كلها شباب و برضو الأقارب من الدرجة الأولى الشباب أكثر بكثير عنا بس بتوقع حتى لو الظروف مختلفة كان لسّا بدعي يكون عندي بنات، أحنّ و “ألطف”🙂

  9. Pingback: هم البنات… للممات – By Ola Eliwat | لا شرف في الجريمه

  10. Pingback: هم البنات… للممات – By Ola Eliwat | NHC

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s