مين أختك؟

عم بقرأ حالياً رواية بتدور أحداثها في فلسطين في بدايات وأواسط القرن الماضي، واللي لفت انتباهي في القصة هو إنها بتظهر جانب قليل ما بسمع عنه عن العادات الفلسطينية، وخاصة إنه الأحداث مستوحاة من الواقع يعني مش مجرد نسج خيال. يعني بصراحة دايماً بنسمع قصص كيف كانت المرأة دائماً مقموعة في كل شي وكيف كان في تمييز ضدها ومن هالحكي، بس في هاي الرواية ببين الكاتب جانب مختلف، وببين قديش كانوا يكرموا الكرأة ويسموها “الأصيلة” وكيف كانوا يتفاءلوا بالمواليد البنات حتى إنه كان عندهم مثل بقول “سنة البنات نبات” ومن هالحكي

امبارح وصلت فصل في الرواية بصير ي مواجهة بين رجلين، فواحد منهم بقول: ما بكون أخو خضرة إلا إضا كذا وكذا، بقوم التاني برد عليه: وأنا ما بكون أخو العزيزة إذا ما عملت كذا وكذا. بصراحة الموضوع لفت نظري وعجبني كيف كانوا يتفاخروا بأخواتهم وبأسماءهم يعني الرجل كان شرف بالنسبة إلو يكون أخو خضرة أو العزيزة أو أو أو… لأنه كان المرأة إلها قدرها ومكانتها. ي

بينما لو قارنا زمان بالوقت الحالي، هلأ صار أكبر عيب الواحد يحكي اسم أخته أو أمه! مصيبة المصايب… ومش بس هيك، حتى مجرد كلمة “أختك” صارت بحد ذاتها عيب ومسبة، حتى إنه يمكن بعض الناس يلاقوا عنوان البوست هاد “مش مريح” نوعاً ما ويمكن في ناس تستحي ترد عليه حتى. طيب ليش؟ وقال منزعل من كلمة “حريم” في المسلسلات السورية طيب ما إنت لما تستحي تحكي اسم أختك أو حتى الكلمة نفسها كإنك بتحكي إنه أختي عبارة عن عيب كبير وإشي محظور

قبل فترة كان خالي بيعطي دورة تدريبية في بلد عربي شقيق من دون ذكر أسماء البلاد، وكانوا المشاركين بعبوا نماذج لشيء معين وكان اسم الأم مطلوب، فلاحظ خالي إنه واحد منهم ما كتب اسم أمه، قام قاله: لو سمحت اكتب اسم والدتك، قام هداك اطلع عليه وضحك باستهزاء وراح. لما بدت الدورة وقف قدام المتدربين وحكالهم: مين أعظم شخصية في العالم؟ حكوله: الرسول محمد صلى الله عليه وسلم، قام حكالهم: في واحد فيكم ما بيعرف اسم أمه؟   لا

الخلاصة هي إنه تاريخنا مش كله تخلف وعنصرية، وحاضرنا مش كله تقدم وانفتاح، وللأسف شكلنا عم نتقدم في أمور وبنتخلف في أمور تانية، زي اللي بمشي خطوة لقدام وخطوتين لورا

آخر شي ولتغيير المود تذكرت قصة بتضحك عن هاد الموضوع حكالي إياها أخوي، كانوا هو وصحابو طالعين وقفهم شرطي وطلب هوية واحد فيهم، قام الشب أعطاه هوية الجامعة، الشرطي قاله بدي هوية الأحوال المدنية، قام الشب تطلع على صحابو وقال: ب

 “فش فايدة، بدو يعرف اسم إمي”

15 responses

  1. آه و الله معك حقّ
    بيجي الواحد تلفون و بسألو وينك؟
    إيييييه ,,, أمممم أنا مع العيلة، بره
    أو : أنا مع المدام
    كأنو ذكر الاسم إشي عيب أو إذا واحد سمع الاسم بتكون مصيبة المصايب

    أنا ما بدّي أدّعي إني ما كنت هيك لأنو بكون كذاب بس تغيرت و حسيت حالي قديش كنت سخيف

    بس ترا ما حدا يقلي شو اسم خواتك ، أيوااااااااااااا بقلبها دندرة
    هاهاهاها
    * ما عندي أخوات أصلا ً

    إحنا مجتمعنا شرقي و محافظ ، ماشي كل هذا على عيني و راسي بس إنو أصير أتهرّب من ذكر اسم زوجتي أمام أخوي أو أمام ابن عمها مثلا ً فهذا يكاد يقترب من قمّة السخف
    !
    شكرا ً علا و يا خوفي تسمعيلك كلمتين على هال”بوست” من كم واحد😉

  2. great post! I did not know this, its a shame that we havent maintained the ‘good’ things from our past.

    Btw what is the name of the story you are reading? I would love to read it too🙂

  3. عندي قصة طريفة عن الموضوع، بتذكر حادثة صارت مع قريب الي بيشتغل معلم مدرسة، وفيه نظام خاص لبيانات الطلاب ( نظام eduwave ) والمفروض يتم تعبئة بيانات الطالب كاملة: الاسم الرباعي، اسم الام، الرقم الوطني…الخ، معظم الطلاب ما عبوا اسم الام في النموذج، واللي كتبه اعطى اسم غير حقيقي. علشان الاستاذ يحل المشكلة طلب من كل طالب شهادة ميلاد، الطلاب جابوا الشهادات بس (خربشوا) على اسم الام، في النهاية يئس الاستاذ واضطر يرجع لملفات الطلبة المدرسية ويستخرج شهادات الميلاد منهاعلشان يعرف اسم الأم.

    بحب اضيف شغلة وبعتذر اذا كانت مهينة شوي بس صحيحة جدا، انه المسبة اللي بتبدا ب (يلعن اختك، او يلعن امك) اقوى 1000 مرة من ( يلعن ابوك) ومهينة جدا، طبعا لأنا مجتمع ذكوري ومفهوم (انثى) بحد ذاته عار وعيب.

  4. كلامك صحيح، للان في ناس بعرفهم و حصوصاً الكبار بالعمر معروفين باسم الام اكثر من ما يكونوا معروفين باسم الاب مثلاً: محمود الفاطمة، بس للاسف تغيرت المفاهيم بهاد الزمن وصار مجرد ذكر اسم الام عيب و بصير مذابح بس لمجرد ذكره!

  5. موضوع حلو

    حلو ان الواحد بيفخر باسم اخته
    بس فيه عادات لسا متاخرة

    بس عندنا خفت شوي الحمدلله

    واحد من اخواني قدامنا يقول انا اخو مريم
    بيفتخر باختي الكبيرة بس مااعرف اذا برا بيفتخر او لا

  6. لساتها العادة موجودة في بعض المناطق في فلسطين انا من نابلس في عنا بعض من هالعادة لسه
    بعرف اسماء امهات كل اصحابي وبنسا شو اسم ابوهم😄
    في مثل بحكي عنا الرجال من مرته
    ما في داعي للتوضيح😀

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s