كله صابون

حقيقة: الإنسان بعيش وبتعلم. وكل يوم بنشوف أشياء جديدة وبنكتشف إنه كانت عنا مفاهيم خطأ عن أشياء معينة وعادي، مش مشكلة، بس المشكلة الواحد يحصر حاله في زاوية معينة وعالم معين وما يحاول يعرف أكتر عن الناس والعالم اللي حوليه، طبعاً كتير ناس ممكن يحاولو يبرروا الجهل بأمور معينة بكلمتين سحريتين، مثلاً بتقول لوحدة: معقول ما بتعرفي مين نيلسون مانديلا؟ بتقوم بكل “استزبال” بتقول: ما بعرف… ما بهمني أو عشان تكمل بتقولها بالإنجليزي

I DON’T CARE

بلاش ندخل في السياسة خلينا نبدا بأشياء أصغر. مثلاً لما تحكي لحدا إنك بتلعب يوغا بقوم بضحك عليك وبقوللك: “شو يعني بنقعد تتأمل؟” طبعاً من وإحنا صغار هاي الفكرة اللي عنا عن اليوغا، واحد متربع عالأرض وعايش مع نفسه، يعني ممكن تعمل تجربة وتحكي لبعض الناس إنك بتفكر تسجل حصص يوغا عشان تشد جسمك أو تنحف، وشوف كم حدا راح يرفع حواجبه ويقوللك: “عن جد اليوغا بتنحف؟”  ونفس الموضوع ركوب الخيل، الفكرة العامة إنك بتقعد عالحصان وبمشي لحاله زي مدينة الملاهي، بينما الموضوع أبداً مش هيك… كويس الواحد يعرف برضه

أو مثلاً، الأفكار المأخوذة عن الناس في المجتمع وكيف بنقسم الناس لفئات وبنحط عليهم Labelsمثلاً، وهاد موقف صار مع أكتر من بنت بعرفهم، بتكون بنت اجتماعية وشخصيتها منطلقة ونشاطاتها كتيرة أو حلوة ومرتبة بس ما بتكون متحجبة،  بتكون في مكان معين فبتقوم تصلي، الناس بستغربوا! إنه ول! هاي بتصلي! مش فاهمة شو المانع يعني؟ شو مواصفات الشخص اللي ممكن يكون بصلي؟ نفس الإشي لما تكون وحدة متحجبة ومتدينة إلى حد ما وخصوصاً لو كانت هادية بطبعها، فبيجوا بعض الناس بعتبروا إنه هاي البنت مش ممكن يكون عندها طموح مهني وإنها بالتأكيد تقليدية وكل شي فيها تقليدي ورح تتزوج تقليدي وتعيش تقليدي!

طيب مين حاول يعمل ريجيم مثلاً؟ عمرك سمعت حدا بقولك: الفواكه بتنصح؟ بكون الواحد بوكل جنك فود بالهبل ولما ييجي يعمل ريجيم بصير يحكي الفواكه بتنصح! على أساس عشان فيها سكر، بغض النظر عن نوع السكر وعن كمية الماء والفيتامينات والألياف اللي موجودة فيها، بدبحك وهو يحكي الفواكه بتنصح… عيش عالخس

يعني هاي أمثلة أنا مش عم بكتب عشان أتفلسف على حدا لأني بحكي عن حالي قبل الكل، كلنا كان عنا أفكار خطأ وتعلمنا وغيرناها ويمكن لسا عنا أفكار خطأ كتير ما بتعرف إنها غلط… المهم نعرف نختار بين إنه ندور ونحاول نتعلم وبين الخيارالأسهل طبعاً وهو إنه  الكلمة السحرية I don’t care… قال يعني cool ومش فارقة معنا

يا ترى بيجي يوم بصيروا الناس فيه بدل ما يقعدوا بالساعات على الفيسبوك بنطوا من لينك للينك ويتفرجوا على صور ناس ما بعرفوهم وبكتبوا status عن الحب والفراق وغدر البنات وقرف الشباب، بدل هالحكي بتصير الناس تفتح ويكيبيديا أو غوغل ويطلعوا من لينك للينك عشان يقرؤوا عن أشياء جديدة ويمكن حتى يزيدوا المحتوى العربي على الإنترنت لأنه فضيحة بصراحة… خليها أمنية للعقد القادم! 0

3 responses

  1. أبدعتي علوووش..وع قصة هاد الموضوع في واحد عمره فوق الـ40بدو يتعلم لغه إنجليزية مش حبا منه طبعا بس انفرض عليه من شغله فبحكي انا ما بحب أغلط وأنا بالحصه مش عشان بستحي من المدرس بس لأني بفرق عندي الناس إللي حولي إزا ضحكوا..فأنا مش ناوي أكمل ..جد الناس غريبه

  2. احنا مجتمع الثقافة السمعية و المغالطات و الاراء الشائعة … حتى ويكيبيديا العربية بتلاقيها نسخ لصق من ايميلات الفورورد … و صراحة في حق علينا ، و علي شخصيا ، لانو مش عارف احكي كلمتين على بعض بالعربي و كل حكيي بحسه مترجم عا جوجل … و ازا بدي احكي أو اتعلم عن أي موضوع ما بينفع إلا بالانجليزي

    ازا حدا بيطلع عالمنتديات العربية و هي اكتر نسبة من المواقع العربية بيلاقيها كلها خرافات و خزعبلات … ما بنعترف بالعلم و لا بالرأي الآخر ولا بالبطيخ … هالبوست اجا على وجع صراحة انا هاد الموضوع موتني قهر

    في مية ألف حل بس احنا ما عنا انضباط ولا التزام و اولهم انا … فكالعادة زي ما بنحكي : خليها على الله !!!!!

  3. Pingback: كله صابون « شباب شباب

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s