عن رمضان وشوارع عمان

رمضان كريم يا جماعة.  مش بس كريم، ومبارك وسعيد وشهر تأمل وهدوء وسكينة وركزولي على هدوء وسكينة. 0

طبعاً السكينة والهدوء في رمضان بتيجي من عدة أسباب. في ناس لما ييجي رمضان بترتفع عندهم الروحانيات وبنشغلوا بالتأمل والعبادة فبتصير عندهم راحة نفسية. في ناس بصيروا هاديين لأنهم بضلوا طول النهار نعسانين ويمكن يقضوها نوم وطبعاً في بعض الحالات ممكن يكون نومهم عبادة لأنهم بكفوا شرهم عن الناس. بس للأسف، في بعض الناس بكون تأثير رمضان عليهم عكسي، أو بالأأحرى مش تأثير رمضان هو تأثير السم الهاري اللي بتزمهروا طول السنة (الدخان يعني) أو حتى يمكن ما يكونوا مدخنين بس الجوع فاجر… 0

مثلاً أول يوم رمضان كنت مروحة على البيت الساعة 4 تقريباً، وبينما أنا واقفة على الدوار السابع ولا هو تاكسي وراي انجن، طبعاً أنا ضد التعميم إنه هادا إشي خاص بسواقين التكاسي لأنه المجانين ممكن يكونوا في تكاسي أو في سيارات “فارهة” ما بتفرق… 0

المهم، أنا واقفة زي المحترمين لأنه في سيارات على الدوار والأولوية بشكل طبيعي إلهم وأنا مش حابة أعمل حادث، بتعرفوا رمضان والدنيا حر مش شغل توقف تستنا كروكا، ومن هذا المنطلق وقفت أستنى السيارات اللي على الدوار وابتعدت عن “الجحشنة” أكرمكم الله… بس يبدو إنه الأخ اللي وراي ما عجبه، صار يزمر إنه إمشي، طيب يا ابن الحلال وين أروح؟ أفوت في السيارات عشان تنبسط؟ المهم، بعد الدوار طلعت على اليمين والتاكسي لسا في أثري، وراي يعني، وقدامي سيارات، وشو فكركم عمل؟ برضه صار يعطيني ضو عالي ومش عارف شو، طيب يا ابن الناس، يا ابن الناس، شايف قدامي شارع برمح فيه الخيل وأنا ماشية بتكزدر؟ أطلع فوق السيارات يعني؟ يا ريت، أصلاً انا من زمان نفسي في باص بطير زي تاع ساندي بيل… طبعاً أفلام الكرتون اللي بتعمل غسيل مخ للأطفال هادا موضوع تاني

المهم بس طلعت على مسرب تاني لما الوضع سمح وكان ذلك للعلم فقط خلال أقل من 30 ثانية، تجاوز التاكسي عني وصار يشبرلي، ولا عبرته، ضليت ماشية طبيعي، وبعدين بس صرنا على طريق المطار صار قدامي مباشرة وكان قدامه أزمة، فأنا عشان أفحمه (تو كاربونايز هيم  يعني) صرت أزمرله، إن ورجيني وين بدك تروح هلأ. فدغري بعد ما زمرت أعطاها بريك فجائي وأنا أعطيتها بريك فجائي أكتر حسيت البريك بده يفلت، بس ما علينا… 0

المهم، صار يمشي على اليمين بطيء، كإنه فجأة بطل مستعجل! فأنا حسيت إنه بده إياني أطلع عنه عشان يبهدل صحتي أو يعمل إشي فقررت أمشي وراه بطيء كمان. صار يمشي عاليمين وأنا وراه على أقل من مهلي، وبعد شوي قلت لحالي خليني أخفف عقله شوي، صار يروح شمال أروح شمال، يروح يمين أروح يمين وكان طريقه على نفس طريقي لحد ما وصلت نقطة معينة اضطريت أعتقه عشان بدي أروح عالبيت وعشان مش جاي عبالي أرجع لإمي مشطوبة موس أو أدخل مخافر، مش حلوة بحقي يعني… 0

فهادا كان أول موقف في شوارع عمان في رمضان، بس بعد التفكير بصراحة مش عارفة شو كنت بفكر، ليش بدي أعلق مع واحد واصلة معاه لراس مناخيره؟ في هاي المواقف إبعد عن الشر وغنيله

6 responses

  1. أنا متأكد انه أكثر شيء جننه انه كيف بنت تزمرله من وراه. طلعتي من خرجه. برافو عليك.ـ
    لما الواحد يقول لشخص تقبل الله طاعتكم شو قصدو؟ هل هو بس الامتناع عن الطعام؟ وين الطاعه ووين الاخلاق؟
    الناس فعلا مش عافه شو معنى الطاعه في رمضان
    على العموم كل عام وانتم بخير وتقبل الله طاعتكم

  2. رمضان كريم🙂
    فرطت ضحك على
    “شوي قلت لحالي خليني أخفف عقله شوي، صار يروح شمال أروح شمال، يروح يمين أروح يمين ”
    عجبتيني أنا بحب هيك😀
    معك حق الواحد بالآخر بختصر حفاظا على سلامتو🙂

  3. برافو و الله
    هوه الواحد مو مستاهل يضيع وقته مع هيك ناس بس مرات بيضطر

    مصطلحانك حلوة و تحشيش😀

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s