سقا الله

سقا الله أيام الكاميرات إم الفيلم الكوداك،  كان هو هالفيلم 24 أو 36 صورة ولما تيجي تصور الصورة تحسب ألف حساب عشان الصورة اللي بتتصور ما بترجع، وعاد عيش لما تودي الفيلم يتحمض وترجع تاخده وإنت حاطط إيدك على قلبك تطلع صورة فيها رجة ولا صورة حدا بيرمش فيها. قصة طويلة! بينما هلأ بتلاقي الكاميرا ديجيتال وبتضل تطقطق فيها من الصبح لليل إشي بنشاف وإشي ما بنشاف، لأ والنكتة إنه بضلوا الصور أسبوع في الكاميرا وإنت متكاسل تحط الـUSB بالكمبيوتر وتنزل الصور!

يعني الأشياء بتزيد سرعة وسهولة وإحنا بنزيد تنبلة وقلة حيلة

وسقا الله أيام ما كان الواحد لما بده يعرف معنى كلمة “خنفشار” يروح يدور في الموسوعات والقواميس، و كانت بطاقة الإنترنت اللي فيها 9 ساعات بـ45 دينار هادا غير تكاليف التلفون! ولما تيجي تشبك يطلع صوت الديال أب بعبي الحارة والحارات المجاورة زي صوت تشحيط كوشوك سيارة على نزول المصدار. بينما هلأ كل راسمالها كبسة سحرية اسمها Search، يعني صار عنا قدرة وصول للمعلومات ما صارت في التاريخ، وفي كل مكان، بس طبعاً مش كل واحد بكون قاعد ووجهه ملزق في شاشة اللابتوب يعني عم بقرأ معلومات عامة في ويكيبيديا عشان يتثقف، لأنه في ساعات وساعات ضايعة على السوليتير والفيسبوك والتشات المصدي

يعني العلم عم بوصلنا على طبق من فضة، بس إحنا بدناش نتعلم

وسقا الله أيام النص ليرة الورق، أيام ما كان الشلن ينحكى فيه والبريزة إلها وزنها المعتبر، مين كان بفكر إنه ممكن نحتاج لورقة فئة 50 دينار؟ أصلاً شو كان الواحد ييجي عباله يصرف هديك الأيام، كان أحلى مشوار طلعة مع العيلة على منتزه عمان القومي، إذا الحالة ميسورة بهشوا وبنشوا وإذا الحالة تعبانة كل راسمالها طنجرة مجدرة. بينما هلأ بطلع الواحد عالسينما بصرف بقرة جحا وممكن يرجع بسب على الفيلم التافه اللي ضيع ساعتين من حياته عليه

يعني مصارينا كترت ومشاورينا كترت بس البركة قلت

سقا الله!

2 responses

  1. Pingback: The Blog of the Ugly Duckling: وسقا الله

  2. و الله معك حق
    الدنيا لقدام و إحنا لورا ! ما عم “نبدع” إلا أكثر شي بسلبيات هالتقدّم بكل هالمجالات

    ذكرتيني بال نص دينار الورقي 😀

    عندي طحشة منهم و من الشلون و البرايز و القرشين + القرشين و نص

    lol

    عدور ولاد دلادنا حتصير فيه أم ال 1000 “ورقة” شكلو😦

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s