عن المظاهرات في الأردن

 البداية: خرجت اليوم في الأردن مسيرة سلمية  دعت إليها جهات وأحزاب مختلفة من الإخوان المسلمين إلى الحزب اشيوعي الأردني وكان الهدف منها مطالبة الحكومة باتخاذ إجراءات ضد الفسد والفاسدين

 

لهون… قشطة

 

بس طبعاً أهلاً بك في الوطن العربي، وبالتحديد في الأردن. عنا هون إشي عجيب وهو فكرة غريبة بتخلي الناس تكون يا أبيض يا أسود… ما في حل وسط! يعني اللي طلعوا يطالبوا بمحاسبة الفاسدين صاروا بعض الناس يحكو عنهم كإنهم مندسين وخونة وبدهم يخربوا البلد ويقعدوا على تلها. وطبعاً انهالت الاتصالات على القنوات المحلية تعبر عن الولاء للملك والوطن وبتدين المظاهرات السلمية وحطوا 600 خط تحت كلمة سلمية واللي هي في أي بلد متحضر وواعي سياسياً تعتبر ظاهرة حضارية… بس على مين يابا

 

يعني لما وحدة تحكي تلفون تقول ما معناه إنه اسكتوا وانطموا الوضع كويس… بدي أعرف، عندها ولاد مش لاقية تطعميهم أو تدرسهم؟ جوزها عاطل عن العمل؟ عمرك جربت تخسري فرصة عمل أو تتعاملي معاملة دونية لأنه ما عندك واسطة؟ إذا كان الجواب لا، فعلى أ أساس بتحكي؟ وإذا كان نعم، فليش بتحكي أساساً؟ خ

 

الوطنية مش رنة موبايل ولا صورة باردوة على قزاز السيارة، الوطنية يعني تكون بدك بلدك يكون أحسن بلد وشعبك أحسن شعب ولما تشوف إشي غلط ما توقف ساكت. يعني اللي بعترضوا ممكن يكون عندهم ولاء وانتماء للوطن والملك أكتر من اللي حاطين أغاني متعب الصقار وعمر العبدلات 24 ساعة ودايرين من شارع لشارع ومن دوار لدوار

 

بالنسبة للمظاهرات، ممكن يكون عنا تحفظ على بعض المطالب اللي بتبين كويسة بس أبعادها السياسية على المدى البعيد أو حتى القريب ممكن تكون كارثية، بس بشكل عام المتظاهرين اليوم كل اللي كانوا يطالبوا في بشكل أساسي هو القضاء على الفساد وهو أمر المفروض ما يختلف عليه اتنين، لأنه صار مستشري في البلد والمواطنين هم اللي عم بدفعوا الثمن

 

أهم إشي إنه رغم اختلاف الآراء ما صار ضرب ولا نزاعات والحمد الله… بس صار نقاشات بتسم البدن

 

بس شو بالنسبة لقناة الجزيرة؟ بصراحة أنا ما بعتبر الجزيرة قناة عميلة زي ما بعض الناس بحكوا، بعتبرها قناة جيدة نسبياً لكن عندها حركات غريبة! يعني اليوم حسيت إنه يا إما الجزيرة قناة ثورية حماسية بشكل مفرط كل همها تقوم الشعوب ضد حكامها بأي شكل أو إنها من باب مصلحتها كقناة إعلامية عم بتحاول تعمل ضجة بأي شكل. اليوم مثلاً في تغطيتها للمظاهرات في عمّان كانت مسيرات الاحتجاج ومسيرات الولاء ماشيين مع بعض، الجزيرة ركزت فقط على مسيرات الاحتجاج ولما طلع حمزة منصور يحكي كلمة حزب الإخوان المسلمين ما فش خلق الجزيرة لأنه ما حكا عالملك، بالعكس قال إنه الملك سيدنا بس بدنا إجراءات ضد الفساد… فقسة! فطبعاً الجزيرة حطت الخبر على الشاشة إنه في مطالبات بتغيير الدستور وجعل الملك دستورياً

 

على كل حال، بتضل المشكلة الأساسية إنا شعب متعود على القمع وهز الدنب عشان هيك لما يصير في محاولات للتعبير بنلاقيها هجنة! ماشيين على مبدأ “إن لم تكن معي فأنت ضدي” لسا بدنا فت خبز

 

 

4 responses

  1. ما لاحظتي انو الجزيرة ركزو على شوية مشاكل صارت في المظاهرة؟ أنا فعلا حاسس انو القناة بدها أكشن بس

  2. Pingback: 7iber Dot Com » أصوات أردنية حرة: مسيرات و إ/أعلام

  3. علا، برأيك إنو فت الخبز = بدنا وقت يعني هو ال”شيء” الذي علينا انتظاره؟
    بعرف الجواب لأ، بس شو الخطوات اللي ممكن/لازم نعملها طيّب؟

    سواء على صعيد “قوية “صعيد!” صح” فردي أو جمعي؟

    الكل عم يجتهد و معظم إن لم نقل كل هذا الاجتهاد مجرّد قبض ريح..

    و بعدين!

    أنا شو عم بساهم مشان أغيّر طيب؟ و إنت؟
    وين الشخص/الأشخاص اللي يحكولنا شو نعمل بتفصيل و ضمن رؤى معينة يتفق عليها الجميع (الجميع!!!!)
    لا نريد تشخيصا ً لأنه كفانا و أصلا ً الأمور واضحة (المشاكل يعني) ..

  4. هذا حكي فاضي انتوا بدكم اتخربوا البلد الي بدو اشي يروح يحكي للمسؤل عنه في برامج تفضح المسؤلين اذا قصروا لا تسعوا في تخريب البلد كونوا حضارين وليس متخلفين

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s