عن الإصلاح والولاء وشوية بلطجة

فعلاً الأردن بلد العجائب، ومش عم بحكي عن البتراء، لأنه العجيبة الحقيقية إنه إحنا شعب ممكن يدبح بعضه مع إنه الكل في صف واحد

كيف يعني؟

يعني مثلاً في مصر كان في ناس ضد حسني مبارك وناس مع حسني مبارك فصار صراع بينهم، مفهوم، الشيء ونقيضه… لكن في الأردن الوضع مختلف! في الأردن طلعوا مجموعة سموا أنفسهم شباب 24 آذار مطالبين بالإصلاح، فجابهتهم مجموعات تقول عن نفسها إنها مؤيدة للملك، يعني اعتبروني مش من هالبلد وحاولوا تفهموني شغلة صغيرة: هل الإصلاح هو نقيض الولاء للملك أم أن الولاء للملك هو نقيض الإصلاح؟

طبعاً مش رح أجاوب على السؤال احتراماً لذكاء القارىء لأنه أوضح من أن يجاب عليه. بس عندي سؤال تاني من المشاهدات اللي شفتها في الشارع اليوم

قدامك مجموعتين: مجموعة تطالب بالإصلاح والقضاء على الفساد من دون التهديد بأي انقلاب على الحكم وتعبر عن انتمائها لبلدها واحترامها لحاكمها، ومجموعة تانية تقود السيارات بطريقة رعناء ويخرج من السيارة شباب يحملون أعلام الأردن وصور الملك… أي المجموعتين تستحق أن يطلق عليها وصف “أردني حقيقي”؟

أظن كلنا ممكن نتفق على إنه في ناس فاهمة موضوع الولاء والانتماء غلط… ويا ريت لما نحكي على التخريب نتذكر إنه شباب 24 آذار طلعوا مسالمين وبطريقة حضارية والتخريب صار لما إجوا أشخاص واضح إنهم مدسوسين أو لا يفقهون شيئاً عن البلد ولا عن الانتماء وانهالوا عليهم بالحجارة والشتائم

والله عيب يا جماعة اللي عم بصير، وعيب اللي بشوهوا صورة البلد وبقدموا مثال حي للتخلف ينحسبوا على أنهم المجموعات الموالية للملك وكأنه المطالبين بالإصلاح معارضون للملك!! وعيب نضل نحكي إنه المطالبين بالإصلاح مدسوسين من جهات خارجية وكأنه الشباب الأردني غير قادر على فعل شيء من تلقاء نفسه ويجب أن تكون هناك جهة تملي عليه ماذا يقول ويفعل

والعيب كل العيب يكون عنا حكومة فيها شخصيات ذات خبرة في المجال السياسي -وهي الخبرة اللي تم التذرع بها عند إعادة تعيين شخصيات وزارية سابقة-، ومع ذلك لا تمتلك القدرة السياسية على التعامل مع اعتصام سلمي شعبي لاحتواء الموقف بشكل حضاري… سودتوا وجوهنا

والعيب أكتر من هيك يكون عنا جهاز أمن ذائع الصيت ومعروف بأنه الأفضل في الدول العربية ومع ذلك يعجز عن حماية اعتصام سلمي من شوية بلطجية يشكلون وصمة على جبين الأردن والأردنيين

عيب والله عيب

 

 

6 responses

  1. مساء الخير
    والله مش عيب وبس
    ومسخرة كمان

    علشان نعرف ان العقليّة التي تتحكم بالقرار هي نفسها وان تغيرت الوجوه

  2. طيب لما بيطالبوا بملكية دستورية ايش معتاها؟؟؟
    و لما يتخذوا نهج إخواننا المصريين في التكتيك و الشعارات, ايش معناها؟؟؟
    والأهم من هيك, لما يكون قياديي هذه المسيرات من أصحاب السوابق والماضي الأسود, كيف يثق الإنسلن الواعي بأصحاب و منظمي هذه المسيرات؟؟؟؟؟

  3. جهاز أمن ذائع الصيت ومعروف بأنه الأفضل في الدول العربية

    أحنا زي اللي بيكزب الكزبه وبيسدقها . من وين جبتي هدي المعلومه ؟؟

  4. أحمد: هاد الحكي اللس بنسمعه… وزي ما بقولوا: إن طلع صيتك خبي راسك

    Hadeed: من وين جبت إنهم أصحاب سوابق؟ وشو هي السوابق؟ وبغض النظر عن معنى الملكية الدستورية أياً كانت مطالبهم رميهم بالحجارة والشتائم عيب وما بصير ومش طريقة تعامل

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s