بتذكر إني… 2

بتذكر خروف العيد اللي كانوا جيراننا يحيبوه كل سنة، كان حدث الموسم، كل مرة نفس الإشي، بنتفاجأ بخروف في الحديقة وبنضل كل يوم نبلش فيه ونلعب معاه… ما هو كان حيوان غريب غير عن بسس الشوارع والكلاب الجعارية اللي كل فترة وفترة كان واحد منها يعمل حالة رعب في الإسكان

آخر خروف بتذكر إنه جيراننا جابوه كان خروف صغير نوعاً ما، وكان عدائي شوي، ما صاحبنا ولا كان يلعب معنا بالعكس كان يثور في وجهنا ويعصب لما نقرب عليه، وما كان يقبل ياكل منا… إلا في آخر يوم، صار وديع وأليف وياكل منا وانبسطنا عليه. تاني يوم نزلنا عالحديقة ما لقيناه، كلنا هادا شكله حس إنه أجله قرب قال يا رايح كتر الملايح

أما بالنسة للكلاب الجعارية فحدث ولا حرج. بتذكر مرة كان في كلب داير في الإسكان لونه أبيض وعليه بقع سوداء، قد البقرة، فمرة كنا نلعب بالرمل، رمل صويلح ما غيره اللي بكون فيه منه كومة عندعمارة عم ببنوها وبنصير نلعب فيه وناخد منه كمان، ما كنا نفهم إنه هي سرقة مواد بناء! المهم، كنا نلعب ورا البيت أنا وأختي وأخوي وصاحبة أختي أماني. رحنا أنا وأماني نجيب رمل صويلح، واحنا راجعين وحاملين سطولة الرمل شفنا الكلب من بعيد واقف على باب الكراج، أنا صرت أصرخ بصوت عالي، ما هو أنا صوتي مش  عالي إلا شوي، ووقع السطل من إيدي زي المسلسلات! الكلب هرب، وبعدين ركضنا للحديقة ورا البيت لقينا أختي وأخوي متخبيين بين الخزانات ولا صوت ولا حركة زي كإنه المافيا هجمت عالبلد

ومرة كان في كلب أسود شارد في الحارة، وكنا برضه احنا الأربعة المذكورين أعلاه مصدقين حالنا وطالعين مهمة بحث عنه. كنا ماشيين في طابور ورا بعض على أساس بنقتفي آثار الكلب، كنا ماشيين حولين العمارة، ومركزين وبتناقش، فجأة وبس وصلنا  آخر الحيط وبدنا نلف طلع الكلب بوجهنا من الجهة التانية بشمشم، احنا انصرعنا وهربنا والكلب المسكين انصرع هرب! مش عارفة مين كان خايف من مين

هاي أماني صاحبة أختي كانت تعشق الحيوانات ودايماً كان عندها بسس أو كلاب أو طيور أو حيوانات من أي نوع في البيت، وكان كل حيوان بتجيبه إلة مكانة خاصة عندنا، حتى أنا مع إني كنت أخاف من البسس والكلاب كنت ما أخاف من اللي عندها، خاصة كلبتها لوسي، أو تاتشر زي ما أختها سمتها بعدين، كانت كبيرة وسودا، وقد ما كنت أخاف من الكلاب هاي بالذات كنت ما أخاف لما تكون حولينا و أركض وأخليها تركض وراي… عجيب

يتبع…0

One response

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s