مشاعر شخصية حول الأغاني العربية

كمواطن عربي، أنت محكوم بالتعرض لكم هائل من التلوث السمعي والبصري، وجزء غير بسيط من ذلك التلوث يأتي من العدد الفضائي من الأغاني الي يؤديه عدد فضائي من المغنيين بما إنه كل واحد معاه مصاري صار يروح يسجل أغنية أو يصدر ألبوم، وبما إنه مع برامج “المواهب” صارت الشهرة واحتراف الفن زي الشوكولاتة أم الشلن في الدكاكين. وطبعاً مع العدد الفضائي من الإذاعات والمحطات الفضائية والأرضية التي يبدو أن مصطلح “الانتقائية” مش وارد ضمن قاموسها، أصبح يمكن أن تنضرب على راسك بوحدة من هالأغاني في أي مكان: في الباص، في السيارة، في التاكسي، في المطعم،  لما تروح تزور ناس وينادوا ابنهم الصغير يغنيلك أغنية بوس الواوا! ونعم التربية

طبعاً بالنسبة للموسيقى والألحان اللي بتشبه بعضها مش مشكلة، إذا وقفت على هاي بسيطة، العجب يكمن في الكلمات. يعني أولاً، كإنه قد ما علكوا في الكلام ونظراً للأهداف التجارية صار بدهم أي إشي يمشوا حالهم فيه فصرت تعرف المطرب شو بده يحكي قبل ما يحكي وصاروا يدخلوا كلمات بحياتك ما بتتخيل تنحط في أغنية محترمة، ولما تحكي للناس شوه الزبالة اللي بتسمعوها بقوللك: أنا ما بركز في الكلمات. كيف يعني ما بتركز في الكلمات؟ إذا ما بتركز في الكلمات روح اسمع بيتهوفن ولا موزارت، وإذا ما إجوا على هواك اسمع طبلة باسم!0

مثلاُ في أغنية سمعتها كذا مرة، مش متذكرة الكلمات بالضبط بس إشي زي هيك إنه “بحسك معي طفلة مليانة مرح وقلبي طاير فيكي فرح” إنه شو بالنسبة لقرية التوت اللي عايشين فيها، فرح ومرح؟ بس قولوا مش مشكلة هاي كلمات بريئة، قبل فترة سمعت أغنية برضه مش متذكرة الكلمات بالضبط (ألف حمد وشكر لك يا رب على نعمة النسيان) بس فحوى الأغنية إنها الآنسة مبسوطة وطاير عقلها في الزلمة عشان “كسرلها راسها” على مبدأ يقبرني شو رجال! طيب هاي المطربة لو طلع خبر بكرى إنه جوزها ضربها وكسر وجهها ودخلت المستشفى، حدا بسترجي يحكيله تلت التلاتة كام؟ ما إنت فخورة إنه الزلمة دعس عليكي… شو بدكم تحكولها هاي؟0

وبالنسبة للفنانة المخضرمة نجوى كرم: مالها؟ مش رح أخوض بكلمات أغانيها بصراحة لأنه ممكن أطلع عن حدود الأدب… حتى الموسيقى كتير مزعجة. وعلى سيرة الإزعاج، كتير فاعت هاي السنة أغنية تي رش رش، أنا شخصياً كنت أسمع فيها وأسمع إنه في حرب صارت عليها بين مطرب أردني ومطربة لبنانية، الواحد بسمع هيك بقوللك شو هالماستربيس هاي اللي اتدبحوا عليها الأشقاء العرب! طبعاً حصلي شرف أسمع هالملحمة الغنائية قبل فترة قصيرة وكل اللي بقدر أحكيه هو الحق مش عليكم الحق على اللي عملكم مطربين! شو هاد؟ بتحس حالك قاعد في زريبة… لحن معروف وقديم وكلمات ما حدا فاهمها. قال “رش رش رش رش رش رش رش رش تي رش رش تي رش رش”! حتى منظرها وهي مكتوبة المفروض لما المؤلف كتبها مزع الورقة وكبها في الزبالة

وفي أغنية كمان فاعت كتير بالألفين واحدعش، أظن الكل بعرفها لأنها أثارت جدل الحقيقة، والمصيبة إنك بتسمعها في كل الحفلات تقريباً والبنات بكونوا مبسوطين وبزقفوا، وبقولك ليش بكره حفلات البنات!  قال “نحنا ما عنا بنات تتوظف بشهادتها، عنا البنت بتتجوز وكل شي بيجي لخدمتها” سؤالي الوحيد هو: الأخ المطرب وين عايش، في أي كوكب يعني؟ ولا ليكون من جماعة الـ1%؟ مثال بسيط عشان أوضحلكم قصدي:  مرة كنت في حفلة خطبة وحطوا هاي الأغنية، في آخر الحفلة وقفت مع البنت صاحبة الحفلة وصارت تحكيلي إنها مش عارفة كيف بدها تسد أقساطها آخر الشهر عشان ما في شغل! والأخ بقولك: “نحنا ما عنا بنات تتوظف بشهادتها” شكله ما عنده بنات أصلاً! بس المشكلة مش في البنات اللي أصلاً خلصوا جامعة واشتغلوا لما يسمعوا هاي الأغنية لأنهم عارفين الطبخة، المشكلة في البنات الصغار والمراهقات والرسالة اللي بتوصللهم منها: إنت مش المفروض تعملي أي إشي، خلصي جامعة واقعدي استني عريس وعلقي الشهادة في المطبخ، لأنه واضح إنه الهدف الوحيد من الشغل إنك تجيبي مصاري!0

واللي بضحك التناقض العجيب اللي بين الأغاني. يعني هادا بقولك نحنا ما عنا بنات تتوظف وواحد تاني بقولك: “شو بعملك أنا حبيت ومش قادر إفتحلك بيت”. سكرت بالمرة هيك، طريقك مسدود مسدود. أنا بصراحة ما كان عندي مشكلة مع هاي الأغنية كنت بالعكس أتعاطف مع المطرب على أساس الشباب مش لاقيين شغل ومن هالحكي، ما أنا عندي إخوان برضه (من مبدأ احنا عندنا ولايا يا درويش)، بس في بنات مروا بتجارب مشابهة وهاي الأغنية بتضرب على عصبهم، من وجهة نظرهم ببساطة:  إذا إنت هيك تحبش بنات الناس يا أخي! هي وجهة نظر بصراحة خاصة إنه الشباب هلأ بكون الواحد فيهم ما طلع من البيضة يا دوب 23 أو 24 سنة وعامل فيها دراما وبده يعيش قصص حب شيكسبيرية، على شو مستعجل؟ إذا امبارح تخرجت من الجامعة طبيعي ما يكون معك تفتح بيت ولا بطيخ مبسمر ويمكن مش عارف شو بدك في الحياة أصلاً، ويا عيني عليه بقى في الحزين إذا بده يفتح الراديو وتطلعلو هاي الأغنية ويعيش الحالة ويصدق إنه شخص مضطهد في المجتمع

المهم نرجع للموضوع، الأغاني طبعاً لا تنفصل عن الفيديو كليبات. يعني أغنية لحالها نص مصيبة أما أغنية مع فيديو كليب مصيبتين! وإن كانت الأغاني بعيدة عن الواقع فالفيديو كليبات بينها وبين الواقع واقع… مثلاُ بتلاقي الأغنية المصورة بطريقة الفيديو كليب (حسب ترجمة التلفزيون) بتكون فيها المطربة تؤدي دور الزوجة المثالية المنيحة المسكينة اللي كل الناس بحبوها، وفوق هيك بتكون بتشلق، بتحل عن حبل المشنقة، فلقة قمر، ومع ذلك ولسبب ما رفض مصدر مطلع الكشف عنه بكون زوجها بخونها. طبعاً الرسالة من الفيديو كليب بتكون إنه الرجال عيونهم فارغة وما بعبيها غير التراب، مما يزيد العقد النفسية لدى البنات وبالتالي يرتفع مستوى الجريمة في المجتمع

على كل حال منيح إنه في موسيقى بديلة ومطربين محترمين ومبدعين وبعرفوا شو يعني فن عن جد، ولو كانوا الناس مرات لما يسمعوك بتسمع هاي الأغاني بحكوا عنك معقد نفسياً، معلش، إن شاء الله حالة التدهور الفني والضوضاء اللي عايشينها بتكون حالة عابرة، لسا في أمل على رأي فيروز!0

6 responses

  1. احسنت يا ست علا , وصقتي المشكلة بشكل راااااااائع ومسلي ومؤلم في ذات الوقت , كتير عجبني ربط الاغاني بالواقع ” المرير
    يعطيكي العافية🙂 وبهديك خالدة حسين السلمان :لعبر على تركيا واشرب تتن واكيف

  2. وفي اغنيه بيعويّ فيها المغني
    فيها مقطع كامل كله عاوّ عاو ّعاوّ……
    هاي اخرتها….بيفكرنا كلاب؟؟؟

  3. نسيتي حبل باب” الأغناني العراقيه” إلي إنفتحت بسستمات سيارات البلد
    وسنحه اللي تسنحهم

    بما إني أصلاتن بسمعش أغاني وبنجبر أسمعها أحياناً
    بجد بكون فاتحه تمي للدبان ومستغربه إنه شو عم تحكو إنتو؟؟
    واااااااااال,, خلص الحكي من الدنيا معقول؟؟؟

    نيسان,, أخدتي االعو عن لساني,, عو عوع عوعوعوع

    صباحك خير,,

  4. أنا قرأت بس أول سطرين من مقالك, بحب أحكي إنك فشيتلي غلي

    آخر شي ناقصنا هالايام مغنيين صار في over saturation و لازم ينحط حد للمسخرة هاي
    المشكله مش بالمغنيين الحثاله, المشكله بالتفه اللي بعيروهم اهتمام

    و سلامتكم

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s