عن الفضاء الإلكتروني الأردني

ملاحظة: أي تشابه بين الأشخاص الموصوفين في هذه المدونة وأشخاص حقيقيين هو مقصود 100% واللي ع راسه بطحة…0

بشكل عام يمكن وصف الفضاء الإلكتروني الأردني بأنه مكان ممتع وحيوي وملي بالتناقضات، وقد يبعث على التوتر ويوجد لديك رغبة في شد شعرك والخروج والصراخ بأعلى صوتك في الشارع. مكان لطيف يوجد فيه ناس من جميع الأطياف والأفكار اللي ممكن تتخيلها واللي بحياتك ما كان ممكن تتخيلها. يعني بمعنى آخر هو مكان “لا ينفك يفاجؤك البتة” 0

وأكثر مكان ممكن تلاقي فيه تنوع ثقافي وفكري في الأردن هو تويتر، أماالفيسبوك مثلاً فيغلب عليه طابع الدراما و”التزبيط” ، الشغل الحقيقي في تويتر. والأردنيون على تويتر أنواع، نذكر منها على سبيل المثال لا الحصر ما يلي، وممكن الشخص الواحد ينتمي لأكثر من نوع:

جماعة “تشدش على حالك لتفقع”: هاي المجموعة اللي ماخدة تويتر جد كتير وممكن يخوضوا عليه حروب ويشكلوا عداوات حقيقية ومعطين حالهم أهمية زيادة عن اللزوم

جماعة (آي آم بيغ أون تيوتر): جماعة  مثيرة للشفقة. الواحد فيهم مفكر حاله إذا عنده فولورز كتير معناته هو صار إشي مهم في الحياة، وطبعاً ما برد على أي حدا ولا بعمل فولو لأي حدا عشان البرستيج

الإصلاحيين: أشخاص يكونون عادة ذوي مطالب شرعية لكنهم متهمون على الدوام بأنهم مدسوسين وبوخدوا تمويل خارجي وبأنهم بدهم يخربوا البلد، ليش ما حدا بعرف، هي البلد زابطة وفش فيها مشاكل ولا فقر ولا ظلم وهم بدهم يخربوها ويسووها من بلدان العالم التالت… الرابع عفواً

السحيجة: هم الجماعة اللي  بتشعر إنه هدف وجودهم على تويتر ترصد الجماعة المذكورة أعلاه بطابق. وهم درجات، لكن أكابر السحيجة بتعرفهم من علامات معينة، منها شيء يشبه الفوبيا من المس بنظام الحكم، لدرجة إنهم مش بس بدافعوا عن الحكومة في الأردن لأ، بدافعوا كمان عن الحكومات وأنظمة الحكم في كل الدول الأخرى وكأنهم بكرهوا أي شيء له علاقة بالمعارضة لأنه أي معارضة برا ممكن تمتد لعنا وتعدينا. فإذا كانت لديك أي ميول إصلاحية أخي القارىء الكريم، ننصحك بعمل أنفولو وبلوك لهذه الفئة وإذا بتقدر كمان أنفولو وبلوك للي بعملولهم ريتويت وإف إف

جماعة بلا ولا شي: أشخاص لطيفين عايشين مع نفسهم، عندهم آراء خاصة فيهم بس بحترموا آراء الغير، بحكوا عن الإنسانية والوطن والقومية وما إلى ذلك وبحطوا أغاني لزياد رحباني وأشعار لمحمود درويش وما إلى ذلك. طبعاً ممكن يكون في منهم متطرفين بحكولك “أنا قرأت كتاب ولقيت حل مشاكل العالم كلها” أو ما شابه ذلك، سيبك منهم ولا تناقشهم أحسن.

جيل الطلائع: جماعة بيعطوك أمل في الحياة وبحسسوك إنك عم تكبر في العمر بس معلش. عادة بكونوا طلاب مدارس وجامعات بكتبوا عن الامتحانات والدراسة أو بحطوا نكت أو بحكوا عن الرياضة والفن وكلام فاضي مرات بس بغير الجو، بتحسهم أطفال العيد. في منهم بيظهروا مستوى عالي من الوعي الاجتماعي والسياسي ومن هنا بتحس إنه الدنيا لسا بخير. ننصح بمتابعة عدد منهم ضمن من تتابعهم، ضروريين

جماعة هذي حياتي: هم الذي يتهيأ لهم لسبب ما إنه إحنا بهمنا شوب يعملوا أو وين بروحوا في كل لحظة من لحظات حياتهم. يعني مثلاً أنا شخصياً ما بهمني أعرف إذا فلان الفلاني موجود حالياً في البنك إلا إذا كنت عم بخط معاه عشان نسرق البنك، ولا بهمني إنه فلان العلتاني روح على البيت، ما تروح ولا يجعل عمرك لا روحت، واحنا مالنا؟ هاد الحكي ممكن يكون مهم لأشخاص بحبوا يتبعولك وين بتروح طول اليوم، يعني مثلاً الست الوالدة، المدام، الستوكرز تبعونك، المخابرات العامة… هيك ناس

جماعة بدي أصير وزير: عامل فولو لكل المسؤولين وبخاطبهم كإنهم رح يردوا عليه

الأنتربنورز: ناس مركزين كتير، بعملوا تويت لأرقام كتير وطول نهارهم في أحداث وفعاليات، يعني عالم مش فاضية، بس لازم من فترة لفترة يعملوا ريتويت لفادي غندور. طبعاً الكلمة فقدت معناها لأنه صار أي شخص عنده تويتر أكاونت وعنده موقع إلكتروني بسمي حاله أنتربنور. يتميزون بالاندفاع والحماس الشديد

جماة عمّان تي تي: ناس بكتبوا أشياء يستعصي على أمثالي المتخلفين تكنولوجياً  فهمها،  بس واضح إنهم فاهمين عن شو بحكوا،  عدد لا بأس به منهم –وليس جميعهم- ينتمون للفئة السابقة

الجماعة اللي فاهمين تويتر غلط: وهم اللي إذا بتغلط وبتعملهم فولو ببلشوا فيك دايركت مسجز إنه ممكن نتعرف وممكن نتنيل، عادة بكونوا جربوا الموضوع عالفيسبوك وما زبط، أو زبط، فبمدوا نشاطهم لتويتر

طبعاً في مجموعات أخرى صعب أسترسل في شرحها كجماعة طل النشمي من الخندق وحبك ألوان وبليز دونت تتش مي ومتلهم متايل

16 responses

  1. اما التويتر بالنسبة الي هو زي الحسبة , تعرفت على كمن واحد و بحاول اني اقوي علاقاتي فيهم , اما الميول التويتر بتشدني الاحداث السياسية الواضحة , يعني مو اي شي , بدون نشاط رياضي , و اكييد جماعة عمان تت الي فاهمين شو عم يعملو ههه , على فكرة كتير جمعتي اصناف من التويتر , وفي كتير متل الملحدين , و الصحفين الي دايما نازلين بالأخبار العاجلة من كل مكان في الاردن , شكرا على المقال و يعطيكي العافية .

  2. “ننصحك بعمل أنفولو وبلوك لهذه الفئة وإذا بتقدر كمان أنفولو وبلوك للي بعملولهم ريتويت وإف إف”
    مرات مش ضروري … بنخلي اكمن حدا منهم لزوم تغيير الجو ونتأكد انه المجتمع في حالات “”لا توصف””

    الحلو في الموضوع انه بدون امثلة … الي متابع تويتر لحاله بيعرف فلان هون وفلان هناك

  3. وصف السحيجة قوي جدا يصلح تعريف يوضع في القواميس …في فئة ياريت لو تضيفها اللي هي الفئة تبعت oh my god ..hi . wow . really …هدولالاردنيين اللي اصولهم من منهاتن او لندن…يعطيك العافية

  4. عيني شملت الأغلبية الطاغية “طاغية!”🙂 – و حسيت بإني تبهدلت “شوي” بالمحصلة😀

    • Haitham i don’t really know you at all, but i don’t know if my photo reading works, but you seem like a very nice guy, that even though you think Ola’s categorization applied to you, but you know sometimes there are exceptions ..

      • I`m –really- lost for words! I thank you dearly🙂
        I tend to abuse my twitter :confession: but all in all I think I`m O.K. lol
        Many thanks again

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s