عزيزي مجلس النواب الأردني

آسفة على الإزعاج، بعرف إنتوا ناس عندكم مشاغل، مش فاضيين، عندكم واجبات وحقوق شعب بدكم تطالبوا فيها وحقوق بدكم تضيعوها، فش وقت. بس اعذروني لأني كمواطنة بسيطة على باب الله أشعر بأهمية أن أعبر لكم عن شكري وامتناني لجهودكم عشانكم إنتوا بتتعبوا معنا

أولاً، شكراً أعزائي النواب، يا ممثلي الأمة، عشان لفلفتوا قضية الفوسفات ودفنتوها بأرضها، واضح إنكم أحرص الناس على وحدة الصف ومصلحة الوطن، شو يعني 25 مليون؟ مش بيناتنا… ما في داعي نعمل قصة وطنة ورنة ونفقد ثقة المواطن بالحكومة عشان ملاليم.  هي أصلاً الثقة كانت معلقة بقشة وهلأ فلتت بالمرة لا عدنا نوثق بحكومة ولا بنواب وهو إنجاز ُيحسب لكم أعزائي ممثلي الشعب العظيم لأنه ما دام ما في ثقة يعني ما في توقعات وما دام ما في توقعات يعني ما في إحباطات وهكذا كل واحد بسكر عليه باب داره وبقول حسبي الله ونعم الوكيل ويا دار ما دخلك شر. وطبعاً هاي بتصفي مشكلة الشعب، هو عنده بارانويا بطّل يوثق حتى بأبوه وأمه، فبدل ما نضيع الوقت واحنا بنحاول نلاقي كم حرامي ونرجع كم مليون من طرف الجيبة ممكن نقضي فيهم على كم جيب فقر، خلينا نحط خطة استراتيجة لجعل علاج الأمراض النفسية مشمولاً بالتأمين الصحي لكل مواطن وغسيل دماغ مجاني مع كل 10 زيارات. وهيك بريحوا وبرتاحوا

ثانياً، يبدو أنه نظراً للإنجازات العظيمة التي حققها النواب خلال العام المنصرم ونظراً إنهم جابوا حقوق الشعب كلها وما ضل منها إشي والشعب كله مرتاح وبيدعي للنواب (أو عليهم) فالنواب الأكارم شافوا إنه حان الوقت يلتفتوا لأنفسهم شوي، ويا عيني المساكين شو طلبوا؟ كل اللي بدهم إياه من هالدنيا جواز سفر أحمر مدى الحياة وتقاعد مدى الحياة. يعني هو صحيح النائب بخدم 4 سنين (إذا ما حلوا المجلس أو سحبوا من النائب الجواز الأمريكي فاضطر يستقيل) بس من حقه النائب يضل ياخد تقاعد طول عمره زيه زي أي شخص بخدم في وظيفة 30 أو 40 سنة. وطبعاً هذا القرار لازم يتنفذ على كل نائب في كل دورة مجلس أمة، واحنا شو ورانا، خلينا نضل طول عمرنا نصرف على النواب وهم في المجلس وحتى بعد ما يتقاعد الواحد فيهم على مزرعته في إربد أو على الفيلا تبعته في دابوق، لأنه بصراحة السيارات الفخمة والبنزين اللي بطلع من راس دافعي الضرائب في الآخر ما بكفي عشان نشكر النواب على إنجازاتهم الكبيرة في خدمة الوطن والمواطن وعلى رأسها الخدمات الترفيهية من خلال جلسات المجلس التي تبث عبر التلفاز، مسرح سياسي هزلي بكل معنى الكلمة

بعدين شو يعني جواز سفر دبلوماسي مدى الحياة؟ يعني أمورك ميسرة ولا بتمر على نقاط تفتيش ولا حد بسألك تلت التلاتة كام. وبما إنه النائب بكون على راسه ريشة طول ما هو في المجلس بحجة تسهيل مهامه الدبلوماسية فمن حقه الاحتفاظ بهذه الريشة مدى العمر كنائب سابق، لأنه إشي كتير مشرف بصراحة نظراً للإنجازات الهائلة اللي قاموا فيها. مش بكفي رح ياخدوا منه السيارة؟ كيف بده يتمشور كلب المدام هلأ؟

وبما إنا شعب جاحد وما بنقدر الجميل وواجعين راسهم بالاعتصامات والمظاهرات (ليش يا جماعة؟) فأنا خطرت ببالي فكرة لإظهار الشكر والعرفان لنوابنا الأفاضل، بدنا نعمل يوم نسميه عيد النواب، وبكون اليوم هو 14/2 تماشياً مع ثيم اللون الأحمر عشان يكون الكل متشحاً بالحمار (نو بن إنتديد) مش بس جوزات السفر ونمر السيارات، والمواطنين بطرشوا حالهم أحمر وبطلعوا ولادهم من شبابيك السيارات حاملين أعلام حمرا والحزب الشيوعي بفيع ساعتها أو بلاقيله لون تاني

فشكراً لكم يا ممثلي الأمة وفي النهاية بحب أقول كلمة للي ما فهم أو اللي ما بده يفهم أو اللي فهم ومطنش، تذكير باللي قاله الرسول صلى الله عليه وسلم “إنها أمانة وإنها يوم القيامة خزي وندامة، إلا من أخذها بحقها وأدى الذي عليه فيها” وإذا إنتوا شايفين إنكم أديتوا حقها فعلى البلد السلام، وما ضل عندي إلا شي واحد أحكيه: أعزائي النواب، إنتوا ما بتمثلوني إنتوا بتمثلوا حالكم بس، فعلاً إنكم ما بتستحوا

7 responses

  1. والله يا علا … مرة ثانية بلاش من هالحكي … ازعجتيهم ، يعني لا اللي برسم عرف يكمل رسمته ولا اللي بتدور على طبخة لقتها، ولا النايم تهنا بنومته.

    أظن انه هذه من الأشياء الأساسية التي تفقد كل مجلس مصداقيته، ان الكل يبحث عن الراتب و الجاه و ينسى المسؤولية، و عشان هيك يعتبر اي اشي بنصرف على الحملة الانتخابية عبارة عن استثمار مادي فقط.

    لو هاي السواليف مش موجودة و يتقدر النائب بحجمه مش أكثر، كان اللي بترشحوا أصلا اللي بدهم مصلحة البلد.

    و كما ذكرتِ قال الرسول صلى الله عليه وسلم “إنها أمانة وإنها يوم القيامة خزي وندامة، إلا من أخذها بحقها وأدى الذي عليه فيها”

  2. كلام جميل. أنا مع التصرف بناء على معطيات
    مجالس نواب على هيك مستوى برأيي من الخطأ انتخابها أساساً. أنا لم أصوت لأحد منهم ولن أصوت

  3. والله انه كل كلمة عم بتحكيها زي كانها طالعة من قلبي
    انا ما بقول غير حسبي الله ونعم الوكيل بهيك نواب
    هم اللي خلو البلد تمشي بالواسطات
    والشعب صار بنهب بعضو من وراهم

    يسلم اديكي اختي الكريمة على هيك كلام معبر

    تحياتي لكي ولجميع المهتمين بالموضوع

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s