الفيو

امبارح رحت على مكان صارلي زمان ما رحت عليه، اسم المحل “أولد فيو” كافيه في جبل عمّان، وإذا بدنا نعرّب الاسم بكون “الطلة القديمة” كونه بطل على جبال عمّان القديمة وهاي الطلة هي اهم سبب لشعبيته بين الناس، لأنه قعدته فعلاً حلوة على التراس وقدامك هالبيوت المكدسة فوق بعض على مد البصر، وبتلاقي الواحد طول ما هو قاعد بحكي: “ياي ما أحلى الفيو” “ياي شو بحب عمّان القديمة” “ياي أنا شو شعبي”…0

بس عشان تضل مستمتع بالفيو أخي الكريم، أختي الكريمة، في نقطة مهمة كتير، وهي إنك تتحاشى تعمل “زوم إن” أو تفكر الفكرة الواضحة والبديهية إنه هدول الناس كيف عايشين وهم مرصوصين رص فوق بعض؟

يعني بلاش تنكد على حالك، هذه هي عمّان تتجلى بأبهى تناقضاتها: أهم طلة سياحية فيها هي الأحياء المهمشة  اللي ما بقربوا عليها السيّاح واللي لما تروح عليها بتستغرب كيف الناس عايشة وما بتصدق وإنت تطلع منها لسبب بسيط وهو أنها تفتقر إلى أبسط مقومات المدينة… يعني لا شوارع زي الناس، ولا أرصفة زي الناس، وبيوت رح تنهار كمان شوي، وازدحام، وتوقع وإنت راجع منها تلاقي في سيارتك صرصور…0

وأهمّ إشي في الموضوع إنه هاي جزء من جبال عمّان السبعة اللي حفظناها عن غيب، وحفظنا إنه النجمة السباعية إلى العلم، في إحدى الروايات، ترمز إليها. بس عادي، لشو بدهم نظافة وشوارع وخدمات؟ كماليات…0

المهم أخي المواطن وإنت قاعد في الكافيه السياحي لا تفكر في الموضوع بلاش ينتزع مودك، واقنع حالك بأنه الحق على الناس اللي في تلك المناطق لأنه مين قاللهم يسكنوا هناك، ومين قاللهم يخلفوا اولاد ويسوقوا سيارات ويزيدوا الازدحام؟ واستمتع بالفيو…

4 responses

  1. جميل جميل🙂
    حالة التناقض الاجتماعي و المادي خلّف مجتمعين لا تربطهما صلة

  2. نفس الشعور. عمان الشرقية صارت زي حديقة حيوانات او بأحسن الاحوال متحف! و بالمنتصف بين هدول الاسلوبين في فهم المجتمع الشرقي العماني, في الاسلوب شبه الكولونولي, بس الاكثر انسانية من الكولنوليات القديمة, والي ان يكون بدافع الشفقة, بضلو برضو غلط. هدول الناس مش بحاجة مساعدتنا قد ما همه بحاجة مشاركتنا بدون ما نقررلهم مصائرهم زي كانهم قاصرين و ما بعرفو مصلحتهم. هذا كله بالوقت الي بنسى في كثير من سكان عمان الغربية انهم لا يزالو يحملو طريقة التفكير الشرقية و لكن بحكم اختلاف الامكانيات, التعبيرات اختلفت!

    يمكن هادي المقاهي المطلة على عمان بترمز لهدول الطرق الثلاثة في نظرة عمان الغرب لعمان الشرق.

  3. wallah ru7to hatha il makan. .wa istamta3t fel view.. bas kaman fakart ino keeeef keef kol hal byooot mrasasas fow2 ba3d … ino ba7es il wa7ad betla3 min il shubak bela2 jaaro wa2ef odamo.. jad Allah y3een il naas il 3aysheh hayk….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s