أنت والصرصور

الصرصور، ذلك المخلوق الساحر (مش كتير) اللي بس تشوفيه (بما إنه هذا البوست موجه للبنات كونهم ما عندهم مشكلة يعبروا عن خوفهم من الصراصير بخلاف اللي بقول أنا ما بخاف، أنا بقرف بس) المهم، شو كنا بنقول؟ أيوا، اللي بس تشوفيه كإنك شايفة الموت الأحمر (للي عادانا، ونقلع العين اللي لدت تلانا… يا ترى لو اللي بتغني هاي الأغنية شافت صرصور شو رح يصير فيها؟) المهم، شو كنا بنقول؟ أيوا، اللي بس تشوفيه بتصيري تصيحي وبتصحي كل البيت والجيران ويع وقرف وشوف شواربه كيف وهادا بطير… إلى آخره. مع إنه الغريب إنه إنت بتهربي بجهة والصرصور بهرب بجهة يعني هو كمان بعتبرك إشي بخوف، عمري شفتي صرصور فرد جناحاته وانقض عليكي بعدين طلعله أنياب؟ ولا رح تشوفي.0

ورغم هذه العداوة التاريخية بين الإنسان والصرصور، مع إنه لهلأ أنا مش عارفة شخصياً شو بعمل عدا عن إنه وسخ ومقرف وبعيش في المجاري، إلا إنك يا عزيزتي أسأت في تقدير هذا الكائن الوديع اللي ممكن يكون مفيد جداً إلك في حياتك العملية، وذلك لأن الصرصور اللي مش عاجبك ممكن يكون مقياس لأشياء مهمة كتير في حياتك، ونذكر منها:0

1-  مقياس استقلالية

لا تحكيلي شغل وحرية  وتحقيق ذات واستقلال مادي ومش عارف شو، ما بتحققي الاستقلالية الحقيقية إلا لما تقتلي أول صرصور. طبعاً إذا إنت أبوك مدلعك وكل ما يطلع صرصور بتروحي بتتخبي وهو بدبره بمغرفته فصعب تخوضي هاد الاختبار، لكن الجميل في الموضوع إنه الصرصور نفسه كائن متعاون، يعني أول ما يفضى البيت وما يضل فيه غيرك بتلاقيه طلع يتمختر، ساعتها بتضطري تتحدي نفسك، والميدان يا حميدان. طبعاً ما حدا بطلب منك تقتلي الصرصور بطريقة احترافية (شبشب إم-16) من أولها، يعني بالتدرج، بيبي ستيبس، أولها بف بف، بعدين بتزتي عليه الشبشب وبتستني ييجي حدا يقيمه (أنا حالياً في منطقة ما بين هدول المرحلتين) يعني الموضوع بده صبر ومثابرة.0

2- مقياس نظافة:0

لما تكوني تنضفي البيت وتلاقي صرصور قالب على ظهره ومتشنج وميت لحاله معناته يا إما إنه الصرصور دخل عالبيت وكمّل دورة حياته طبيعي ومات بسلام لحاله وإنت ولا هون، يا إما إنه الصرصور دخل وما لقى إشي ياكله فمات، يا إما إنه لقى البيت وسخ كتير بشكل لا يُحتمل فانتحر ومات. عاد شوفي شو بدك تعملي في هاي الحالة.0

3- مقياس رجولة:0

هلأ مواصفات رجل الأحلام تبعك وقائمة المواصفات اللي حاطيتها من الصف الخامس حطيها على جنب شوي، لأنه في سؤال مهم كتير معظم البنات بيغفلوا عنه: “بتعرف تقتل صرصور؟”  عاد إذا حكالك لأ فيعني عقلك براسك بتعرفي خلاصك. حلو كتير منظركم إذا طلع صرصور بالبيت بآخر الليل وهو واقف ورا الحيط بتفرج وإنت دايرة وراه بالبف باف – إلا إذا كنت كنترول فريك طبعاً وهاد الوضع بناسبك لأنه بعزز من سيطرتك-. كمان طريقة قتل الصرصور بتدل على شخصية الرجل، يعني اللي بقتله بالبف باف إنسان مرهف حساس يجيد التخطيط، أما اللي بمزعه حفاية بجيب خميره بضربة وحدة فهاد إنسان مغامر جريء مندفع يحب اقتناص الفرص (بناء على مصدر غير موثوق)0

الخلاصة إنه حان الوقت لننهي الدراما ونتوقف عن معاملة الصرصور كأنه أسد مش ماكل صارله 3 أيام. وبالتوفيق أنا مني وعلي قتلت صرصورين كبار خلال مسيرتي الفنية ومش حابة أقتل غيرهم، بس يعني المهم أخدت الرخصة. عقبال عندكم.0

6 responses

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s