صوتك أمانة، ضبّه وسكّر عليه

لاحظت مؤخراً كيف المرشحين للانتخابات النيابية في الأردن بستخدموا شعارات وعبارات تحث المواطنين على التصويت والمشاركة في الانتخابات من منطلق إنه “صوتك أمانة”، وصراحة استوقفتني عبارة صوتك أمانة لما تكون صادرة من مرشح. وقعها بكون غير يا أخي. يعني لما الدولة تقول صوتك أمانة بنقول بدهم الناس تروح تنتخب عشان يحفظوا ماء وجههم ويقوللك هه، شايفين؟ بدكم ديمقراطية خدوا ديمقراطية للصبح. بس المرشح بتطلع منه غير، كإنه بقول انتخبني والمواطن بسمعها لا تنتخبني. ما هو الصوت أمانة برضه

لكن أنا ما بدي أكون متحاملة أو متشائمة، بل بدي أضم صوتي لصوت المرشحين وأقول، صح، أخي المواطن، أختي المواطنة: صوتك أمانة

صوتك أمانة، فلا تعطيه لواحد صوّت ضد إحالة قضية فساد للقضاء بعد ما انفضحت واتضح إنه مصاريك ومصاري اولادك انسرقت بليلة ما فيها ضو قمر، وهيك تسكر الملف ويا دار ما دخلك شر

صوتك أمانة، فلا تعطيه لواحد صوّت لقرار يمنحه الحق في إنه ياخد من مصاري الشعب تقاعد مدى الحياة عشان خدم كم شهر في المجلس والله أعلم كم جلسة حضر خلال “خدمته”، فبطلنا عارفين مين بخدم مين، هو النائب بخدم الشعب ولا الشعب بشتغل سخرة عند النائب

صوتك أمانة، فلا تعطيه لواحد شاف منصبه كنائب وسيلة يستفيد منها عشان ياخد امتيازات خاصة، جواز سفر دبلوماسي يدور فيه من بلد لبلد طبعاً بعد ما يكون تقاعد وعم بقبض معاش بعيش 3 عائلات مستورة عشان كان ييجي يشبر في المجلس في فترة من فترات حياته

صوتك أمانة فلا تعطيه لواحد عنده المال والنفوذ ومش ناقصه غير المنصب عشان يكمل البرستيج تبعه، جربناهم هدول

صوتك أمانة فلا تعطيه لواحد قرر فجأة، بعد ما عمل عمايله وفرّج الناس كلها عليه، قرر يتستر بالدين عشان يعطي حاله شرعية وبين ليلة وضحاها صار يقول الإسلام هو الحل، يا زلمة هو الإسلام ناقصه تشويه لصورته فمش ضايل عليه إلا إنت تنحسب تيار إسلامي؟ خاف الله يا أخي

صوتك أمانة فلا تعطيه لواحد أخد فرصته وأثبت عدم جدارته وإنه ما بغير ساكن، أو لواحد ما عنده احترام للقبة اللي قاعد تحتها باسم الشعب فقلبها مضافة يوزع فيها بزر وفستق أو حارة يرمي فيها كنادر عالناس

صوتك أمانة فلا تعطيه لواحد أثبت إنه كذاب، أو ما عنده احترام للرأي الآخر لأنه على الأغلب ما رح يحترمك ولا يشيلك من أرضك إذا عارضته

صوتك أمانة فلا تعطيه لواحد بتذكر حقك كمواطن في التصويت وبنسى حقك كمواطن في التظاهر والاعتراض

من الآخر هيك، صوتك أمانة، ضبه وسكّر عليه بـ100 قفل، أحسن ما يضيع

3 responses

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s