بتذكر إني… 5

مش جاي على بالي أنام

بتذكر إني ما كنت أحب أنام وأنا صغيرة، بس كنت أنام “بالكندرة” مرات، بعيد عن السامعين والقارئين

بتذكر إني كنت أضل متمددة وأفكر وأتخيل أشياء حتى أغفى، ولحد الآن هيك بس اللي اختلف هلأ إني لما صرت أميز بداية النوم، لما تبدأ أفكاري تختلط بببعضها ويطلع معي أشياء مش منطقية، يمكن وأنا صغيرة كانت أحلامي مش منطقية أكتر فما كنت أميز، هلأ حتى لما أحلم لازم أضل مربوطة بالواقع لدرجة معينة. ي مرحلة متأخرة من حياتي اكتشفت إنك إذا غمضت عيونك وما فكرت بإشي يتنام، بس ما قدرت أواظب على هذا المنهج

وبتذكر إني كنت أخاف كتير بالليل، لحد عمر معين كنت أنام وأنا مغطية وجهي لحد ما يوم من الأيام أختي خلتني أتخلص من هالعادة، كان في إشي بدي إياه منها وحكتلي إنه ما رح تعمله إلا إذا قمت الغطا عن وجهي، ومن يومها بطلت هالعادة. بس ضليت أخاف بالليل، لدرجة إنه مرة فقت عطشانة كتير،، وضليت ساعة أفكر أقوم أشرب مي ولا لأ، ولما استجمعت شجاعتي وقمت مشيت للمطبخ وأنا مرعوبة ووقفت على المغسلة وأنا مرعوبة وعبيت الكاسة يا دوب في قاعها وأنا مرعوبة وإجيت أشرب وأنا بتلفت يمين وشمال وقبل ما توصل المي لتمي زتيت الكاسة ورجعت ركض على الغرفة

وبتذكر إني لحد عمر 4 سنين وأنا بقوم بالليل وبهرب على غرفة أمي وأبوي، حتى لما رحلنا على بيت جديد وشفت غرفتي بتذكر لهلأ كيف أمي قالتلي: “هي غرفتك، مش تيجي تنامي عندي” لكن من أول ليلة طبعاً ركضت لعندهم، أو هيك بتذكر بشكل مبهم

بتذكر إنا كنا ننام بع مسلسل السهرة، يعني تسعة تسعة ونص تقريباً، وبتذكر كيف كنا دايماً نحضر المسلسل اللي بيجي على قناة عمّان الأولى وفي مرحلة متأخرة اكتشفنا مسلسل السهرة على قناة الشام الأولى

بتذكر أول مسلسل حضرته، كان اسمه دمعة على خد القمر، كنا عند بيت ناس ناسية مين هم وبعدين تابعت المسلسل

بتذكر أشياء كتير أكثر  من أن تذكر، وما بتهم حدا،

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s