اقتراحات جدية جداً لمجلس النواب الأردني – أجلّكم الله

عارفين، لما أفكر بالموضوع بحس إنه يمكن مجلس النواب الأردني (وفي رواية أخرى، السيرك القومي) بعد ما درس الموازنة العامة للدولة وحاول يلاقي حلول للأزمات الاقتصادية والسياسية – اللي بتتجسد في مجلس النواب نفسه، كإنه مهمتهم تمثيل المشاكل مش تمثيل الشعب، ويا للسخرية- بس ما علينا، بعد التداول والتباحث ومحاولة إيجاد حلول للأزمة تلو الأخرى لقوا إنه الحل الوحيد هو إنه نخلص من الشعب، بنطلع مشروع قرار  سخيف منافي للعقول ليس له أي مبرر عقلاني منطقي، مثلاً يعني إنه يعطوا أنفسهم غير عن  رواتبهم وسياراتهم وبنزين سياراتهم، 4500 دينار بدل سكن، وبذلك بنسبب للشعب جلطة جماعية يتوفى على إثرها السواد الأعظم منهم واللي بضلوا عالأغلب الختيارية اللي شرايينهم تمددت وتوسعت وتمططت عبر الزمن فبطل أكبر مجلس نواب يأثر فيهم، وغالباً بكون قلبهم مطفي وفش فيهم حيل يحتجوا أو يعملوا اعتصامات ومصاريفهم بسيطة بتقدر عليها الدولة

خطة عبقرية صراحة، بس أنا عندي اقتراحات أخرى

أنا بقول بلا منه مجلس هالنواب كله على بعضه، بالناقص يعني. وأنا كمواطنة شريفة يحق لي المطالبة بذلك، كيف؟ اصبروا علي شوي: هلأ مش مجلس النواب هو التمثيل السامي للديمقراطية؟ بلا منها يا أخي، على أساس عم نسبح بالديمقراطية سباحة، يعني عالحالتين وجوده وعدمه واحد فأنا بقترح نشيله ونستثمر مكانه في إشي مفيد، مثلاً انهدّ المجلس ونزرع محله فقوس، أو  بنحول القبة لفرع جديد لسامح مول أو كازية مناصير، كلها أشياء مفيدة يعني

واقتراح تاني، شو رأيكم نجوزكم بالمرة؟ إنه سؤال للنائب المحترم اللي رفع إيده بكل حماس تصويتاً لقرار بدل السكن: إنت ولا مؤاخذة قبل ما تصير نائب، كنت ساكن بالشارع؟ بتنام عالرصيف؟ وعلى حد علمي راتبك كنائب أضعاف راتب المواطن الأردني العادي اللي ساكن بالإيجار، اشمعنى إنت بدك بدل سكن؟

وفي اقتراح آخر في غاية الأهمية، في الحملات الانتخابية القادمة لازم يحرص المواطن على انتخاب النائب الأكثر حاجة، لأنه واضح إنهم بوصلوا المجلس عشان مش لاقيين ياكلوا ويسكنوا، فيعني حرام لازم ننتخب الأكثر احتياجاً واللي بتجوز عليهم الزكاة. بس هو شو بدنا بالحكي، اللي شبعان من بيت أهله شبعان، واللي عينه فارغة ما بعبيها إلا التراب، وجواز سفر أحمر، وبدل سكن، وراتب تقاعدي مدى الحياة. بننتخبكم عشان نصرف عليكم ما احنا، عشان تطلعوا مصاريف الحملات والرشاوي من جيوبنا

واقتراح آخر حابة أقترحه لأني حاسة المجلس حابب يقترحه ومستحي لبقية خجل في أنفسهم: شو رأيكم نولع في الشعب ونخلص ونتركلكم البلد ترتعوا فيها براحتكم؟

صوتوا واحكولنا شو بصير معكم، احنا مجهزين كازاتنا وقاعدين

4 responses

  1. ستي علا،
    شكرًا على البوست
    شخصيا أنا لا مع الحكومة و لا مع مجلس النواب باي قرار او اجراء اتخذوه أو سيتخذوه في المستقبل
    لكن،… خبر بدل السكن و المواصلات المتداول على المواقع غير مؤكد او على الأقل ما في رابط يوضح القرار لصورة عن القرار
    ما أخاف منه ان ينفي المجلس او الحكومة هذا القرار بدليل قاطع و واضح و بالتالي وضع الصحف الإليكترونية و الشعب الذي صدق الكلام بانه شعب غير ناضج و غير واعي، الخ من الديباجة المعهودة

  2. مثل ما حكى خالد، في سوالف إنو الخبر غير دقيق
    بس هذا مثال واحد فقط بالنهاية
    ———
    4500 = ثمن السكوت / التغاضي / إلخ

    يا ترى كم ال-“كعكة” إذا هيك!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s