عن المشهد الكوميدي الأردني

امبارح أحد الكوميديين الأردنيين كتب إنه الناس متعاطفين مع صالون سلوى زايد عشان الهجمة الساخرة اللي صارت ضدها، وإنه هاد مصدر رزق، لكن إنه هو كستاند اب كوميديان أردني مصدر رزقه من الكوميديا لقاها فرصة وإجت لعنده كمان

طبعاً هي فرصة، صحيح. فرصة لتقديم فقرة ساخرة سطحية لا معنى لها ولا فائدة وبأدنى حد مطلوب من الذكاء. بمعنى آخر، تتوافر فيها كل السمات التي تتصف بها الكوميديا الأردنية الحديثة التي اكتشفناها قبل بضعة سنوات وصرنا مثل هجين وقع بسلة تين.

طبعاً الموضوع في غاية السهولة، خدلك أي موضوع مكرر ومعلوك وبنمزح فيه كتير، ويا ريت تركز على تاء التانيث (النسوان، الجارات، بنات الجامعة، سواقة البنات) كونه المرأة في مجتمعنا ناقصها تنميط وتمييز أكتر شوي، واعمل فقرة على هذا الموضوع المعاد تدويره واستعماله مع شوية مسبات وإيحاءات، وروح لشركة بدها تعمل محتوى تجاري… ومبروك، إنت صرت ستاند أب كوميديان

شخصياً بطلت أحضر أي ستاند أب كوميدي أردني من زمان، ولا شايفة إبداع كتير في الساحة، وبستغرب من استمرار نجاح بعض الشخصيات التي لا علاقة لها بالكوميديا وبعتبرها خطر على الذوق العام. يمكن الإشي الوحيد اللي حسيته إلو معنى وهدف وبضحك شوي هو “تشويش واضح”، يمكن كمان عشانهم مجموعة فما بتحس إنه عندهم أنا متضخمة، يا حبيبي كوميديان وإيغو متضخم بزبطوش مع بعض

وعلى فكرة، مش أي واحد بعرف يحكي نكت أو بضحك اصحابه في القعدة بنفع يكون كوميديان. الكوميديا مش بس موهبة وإنما فن له أصول تدرس عشان تقدم محتوى حقيقي مش تهريج. زي الغناء مثلاً، إذابتغني في قعدات العيلة وبزقفولك وبتمايلوا طرباً على صوتك فهذا لا يعني إنك تروح تقدم على Arab Idol وتفضح حالك

الكوميديا الصح اللي بتستاهل تنعرض للناس لازم تكون ذكية وإلها هدف يتعدى استدرار ضحكات فارغة من المشاهدين، وتقدملك معلومة جديدة أو توعيك بموضوع معين، لأنه في النهاية ممكن تقيس ثقافة الشعب من الأشياء اللي بضحك عليها، والأشياء اللي بنضحك عليها هي نفسها ممكن تساهم في صياغة ثقافة الشعب

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s