خرزة زرقا

إذا اشتريت سيارة جديدة وشفت صاحبك وحكالك مبروك، وتاني يوم عملت حادث، فهذا لا يعني إنه صاحبك حسدك، هذا معناه إنك شفت صاحبك، وإنك بعديها بيوم كنت مسرع او بتحكي عالموبايل أو بتمسج أو مش مركز لأي سبب فلبست بحيط، أو إنه شخص تاني مش مركز لأي سبب خبطلك السيارة، لأنك كإنسان عاقل مش ممكن تكون مقتنع إنه صاحبك عنده قوة خارقة حملت سيارة تانية لشخص مجهول وخلتها تفوت بسيارتك. والتفسير الآخر إنه إنت مصاب بفيروس شائع الانتشار اسمه “احنا محسودين” فلما شفت صاحبك تم تفعيل الفيروس وبطلت قادر تركز ولبست في الحيط عشان عقلك يرتاح ويثبت نظرية إنك محسود ومنفوس.

وإذا صاحبتك إجت زارتك وسلمت على زوجك وبعد ما روحت ولعت طوشة بينك وبين جوزك وصلت للشيطان الرجيم فهذا مش معناته إنه صاحبتك حسدتك على جيمس بوند تبعك أو على قصر يلدز اللي عايشة فيه، بل معناته إنه إنت وجوزك في بيناتكم مشاكل عميقة أصلاً وكنوا رح تتخانقوا على أي حال فيها وبلاها. أو يمكن معناته إنه جوزك عينه زايغة، أو تخيلت إنه عينه زايغة لقلة ثقة بنفسك أو فيه، فارتفع ضغطك وطلع جنانك عليه. ويمكن يكون التفسير بكل بساطة إنك مصابة بنفس فيروس “احنا محسودين” ووجود صاحبتك خلاكي مقتنعة إنها صابتك بالعين فتعكر مزاجك فطلعت البدري والاخري ع راس الزلمة.

وإذا حطيتي صورة لابنك على الفيسبوك وتاني يوم رشّح فمش معناته إنه انحسد. معناته إنه الدنيا شتا وإنت عندك تدفئة مركزية فبالتالي المجاري التنفسية عنده نشفت مما هيأ بيئة ملائمة لتكاثر الفيروسات فرشّح. أو إنه ببساطة عندك طفل رضيع وبدك تتقبلي حقيقة إنه رح يرشح عشرين تلاتين مرة من هون ليكبر ويشد حيله. ولو أخدتي بنتك زيارة وبعدين وقعت وانفشخت فهاد مش معناته إنه بنتك انحسدت من كتر ما هي كيوت، معناته إنه بنتك شاقة الأرض وطالعة منها وإنه لما تاخديها عند ناس بكون نفسهم يكبوها من الشباك ويكبوكي وراها من بلادتك وبرادة قلبك، وإنه فش طفل إلا بيوقع وبينفشخ وبدغم وبجدر وبحصب ويمكن يدوّد كمان.

وكونك إنسان/إنسانة متعلم/متعلمة وداخلين جامعات فاحفظوا قاعدة منطقية بسيطة: تزامن الأحداث أو تتابعها لا يعني أنها سببت بعضها

وقبل ما تسمعولي سورة الفلق، نعم أنا حافظة “ومن شر حاسد إذا حسد”، بس كمان حافظة:

“فالله خير حافظاً وهو أرحم الراحمين” – سورة يوسف، 64

“وما كان يغني عنهم من الله من شيء إلا حاجة في نفس يعقوب قضاها” – سورة يوسف الآية 68

ومن الأحاديث: “يا ابن ادم لو اجتمع الانس والجن علي ان يضروك بش لن يضروك الا بشي قد كتبه الله عليك ولو اجتمع الانس والجن علي ان ينفعوك بشئ لن ينفعوك الا بشئ قد كتبه الله لك.”

وأزيد عليهم ملاحظة شخصية ممكن أعمل فيها رسالة دكتوراة يوماً ما إنه أكثر الناس تأثراً بالحسد هم أكثر ناس بفكروا فيه وبعملوله حساب، خاصة لأنهم أكتر ناس بلوموا مشاكلهم على الحسد، فبدل ما يدوروا عالسبب الحقيقي بقعدوا يدوروا على شيوخ يقيموا الحسد عنهم. طب إذا إنت حاسس حالك متضايق ومشحون بطاقة سلبية والقرآن ممكن يريحك وهذا شيء طبيعي، ما بنفع تقرأ قرآن لحالك مثلاً؟ القرآن في كل بيت، وما حدا فينا أمي لا بقرأ ولا بكتب، وباب السما مفتوح، مش مسكر بمفتاح موجود حصرياً عند الشيخ اللي دلوك عليه بالزرقا

بكفينا شماعات نعلق عليها خيباتنا وفشلنا، وفي تناقض كبير لما تعلق في بيتك لوحة مكتوبة عليها “ومن توكل على الله فهو حسبه” وإنت في سيارتك معلق خرزة زرقا

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s