شيطنة الطلاق

شو المشكلة في الطلاق؟
هذا السؤال كان في بالي من فترة، من وقت ما طلع خبر انفصال إليزابيث غيلبرت صاحبة كتاب “طعام، صلاة، حب” عن زوجها البرازيلي اللي تعرفت عليه في رحلتها المشهورة وكتبت عنه في الكتاب، وطبعاً طلعت أصوات الشامتين -عرب وأجانب- إنه هاد إثبات إنه فش إشي اسمه حب وكله كلام كتب وما إلى ذلك. ورجع السؤال رن في راسي مع خبر طلاق براد بيت وأنجلينا جولي اللي هم أشهر بكتير طبعاً فبالتالي ردود الأفعال كانت أقوى
أول شي خطر ببالي وقتها: إنه مين حكم إنه زواجهم كان فاشل لأنهم تطلقوا؟ ليش احنا مهووسين بفكرة إنه الحب أو العلاقات لازم تستمر للأبد عشان تعتبر ناجحة؟ يمكن سنة وحدة عاشتها إليزابيث غيلبرت مع زوجها بتسوى عشرين سنة عاشوها زوجين تانيين مع بعض وعافوا بعض من أول سنة. المدة مش المقياس الوحيد
طبعاً أي حدا بفوت بعلاقة بكون بحب إنها تستمر لحد ما واحد فيهم يموت أو يموتوا الاتنين سوا موتة رومنسية، هادا إشي طبيعي، بس مش مضمون، لأنه ببساطة الناس بتتغير والحياة بتتغير، كل اللي بتقدر تعمله إنك تحاول، الموضوع مش سهل وبده شغل من الطرفين، لكن إذا وصلوا مرحلة إنه علاقتهم دخلت غرفة الإنعاش وصفت عايشة على الأجهزة وبس عم بستنوا تموت لحالها موتة طبيعية، فعادي جداً يسحبوا الفيش، هاد مش قتل رحيم هاي فرصة لحياة جديدة
لكن أظن المشكلة تنبع من شيطنة الطلاق. هلأ أكيد ارتفاع نسبة الطلاق في مجتمع ما مؤشر على وجود خلل اجتماعي، بس الطلاق نفسه مش هو الخلل، المنظومة كلها مختلة من ساسها لراسها. بداية من نظرة الناس للزواج، لتوقعاتهم منه، لتوقعات الآخرين منه، لنظرة الناس للمتزوجين والمطلقين، وخاصة المطلقات
طبعاً واضح إنه مفهوم الزواج عنا موضوع مرتبط بالغرائز الجنسية والتناسلية فوق أي اعتبار آخر (داروين رح يكون فخور فينا على فكرة، احنا مصداق لكل نظرياته)، وكنتيجة لذلك بتلاقي عنا ناقوس الخطر بدق عند البنت بعد الثلاثين وعند الرجل بعد الخمسة وثلاثين. إنه خلص، بدك تلحق تخلف ولد ولدين، طبعاً على اعتبار الفكرة السائدة إنه المرأة بعد الخمسة وثلاثين بتكشنط وبتبطل نافعة، وهي فكرة مستمدة من عصور ما قبل الميكرويف لما الناس كانوا يتجوزوا بكير عشانهم أساساً كانوا يموتوا عالأربعين وعشان الفلاح كان لازم يجيب عشر احدعشر ولد يساعدوه في الحقل، لكن مش موضوعنا
موضوعنا إنه بعد هذا العمر المفصلي بصير الرجل والمرأة تحت ضغط اجتماعي إنه ما في وقت، فلازم تتجوز بسرعة وتخلف بسرعة، فبالتالي فش داعي تقعدوا تتعرفوا على بعض أكتر من شهر، عالسريع اللي عليك عليك، وفش داعي تستنوا، لازم من أولها تخلفوا عشان تلحقوا تجيبوا وريث للعرش
طب ولنفرض إنهم بعد ست شهور من العيشة مع بعض اكتشفوا إنهم بقدروش يعيشوا مع بعض، وكان في ولد بالنص؟ طبعاً زي أي شخصين محترمين محافظين في مجتمعنا المحافظ بطبعه لازم يسكتوا عشان الولد ويستسلموا لحياة من التعاسة والإقصاء العاطفي، وبعيشوا مع بعض أربعين سنة ويعتبر زواج ناجح لأنه استمر حتى النهاية. وبصراحة جزء مني بحس إنه يستاهلوا ولازم يتحملوا لأنه الولد ما إلو ذنب، وإنت بمجرد ما خلفت حياتك بطلت ملكك لحالك، بس الجزء الأكبر مني بقول: ليش تعملوا بحالكم هيك؟ وجزء آخر بقول إنه الولد بعيش، بالعكس يمكن يعيش حياة أفضل لما يكونوا أمه وأبوه منفصلين وسعداء من اللي رح يعيشها وهم متزوجين وتعساء.
بس طبعاً احنا عنا مشكلة تانية كبيرة هي وصمة العار اللي بتلحق بالمطلقة. وحدة بتتجوز ست شهور وبطلع جوزها معقد نفسياً وبضربها، بتتطلق منه وكونها مطلقة بصير لازم تقدم تنازلات وتنزل الstandards تبعونها، ويمكن تتجوز واحد أكبر منها بعشرين سنة، ولو كانت البنت حلوة ومتعلمة وفيها كل الصفات المثالية، بس خلص مطلقة يعني بدك تتنازلي، لأنا بنتعامل مع المرأة كسلعة، فإذا تزوجت وتطلقت تصبح مستعملة وبتنزل الresale value تبعتها، مش كإنسان بمر بتجارب بتخليه ينضج من كل النواحي. واه صحيح، جوزها اللي كان يضربها بعد شهرين برجع بخطب وبتجوز عادي
وهون برجع للسؤال: شو المشكلة الكبيرة بالطلاق؟ إذا كان الزواج من أساسه غلط، أو إذا تحول لحالة شبه دائمة من التعاسة فليش يستمر؟ وإذا في حدا مفكر يحكي من ناحية دينية، فتفضل اقرأ سير الصحابيات، كانت الوحدة تتجوز وتتطلق وتترمل وترجع تتجوز وتتطلق وتترمل، وما كان حدا يعيب عليها، بالعكس تنقي وتستحلي وتشترط
أنا بشوف إنه لو صار الطلاق إشي عادي وطبيعي ومتقبل في مجتمعنا فرح تصير 3 أشياء: رح تقل نسبة العنوسة (أنا آسفة على كلمة عنوسة) ورح ترتفع نسبة السعادة بين المتزوجين، ويمكن تقل نسبة الطلاق
تخيل إنه إنت بدك تتجوز، بس مش مضطر تضل خايف ومرعوب من فكرة إنه هاي هي الضربة القاضية ويا بتصيب يا بتخيب، فبالتالي لازم يكون الشخص المثالي 100%، وطبعاً بتكتشف بعدين إنه فش شخص مثالي 100%. لو كان الموضوع أبسط من هيك، اعتبرته تجربة، مثلاُ تعرفتي على واحد، حبيتيه، حسيتيه مناسب وممكن تعيشي معاه، بدون توقعات بالأبدية، وإنما عارفة إنكم إنتوا الاتنين في تجربة، بتعيشوا مع بعض أول فترة بدون ما تجيبوا أولاد تظلموهم معكم من أولها في حال ما اتفقتوا، بدون رعب من فكرة إنك ممكن حياتك تنتهي إذا صرتي مطلقة، بدون صرف مبالغ خيالية كأنك عامل إنجاز حياتك الأكبر، بدون أفورة مشاعر على الفيسبوك وبحبك وحلم عمري من أول شهر، بدون كل هالضغط، بعدين إذا لقيتوا الحياة ماشية حلو وبدكم تستمروا بتجيبوا صبيان وبنات وبتعيشوا بقصر من الغيوم الوردية والغزل اللي بلعي المعدة على الفيسبوك
ولما تكون فكرة الطلاق حاضرة ومش مستحيلة، أظن إنه بصير أصعب أحد الطرفين يضمن الآخر فيفقد الاهتمام فيه. مش بقوللك يسيء الرجل إلى المرأة التي يضمن بقاءها؟ وفي مجتمعنا في اعتقاد ضمني بإنه المرأة هي اللي دايماً بتخاف من الطلاق وبتخاف زوجها يتركها، وياما رجال بهددوا زوجاتهم بالطلاق وكإنه سلاح. أقوللك؟ طلقني وريحني من هالقصة عاد. هادا اللي ضايل علي، واحد يهددني إنه يتركني، أي فك عني
صحيح الطلاق مش إشي سهل، بس هو ما بيعني إنك فشلت أو إنك اخترت غلط بالضرورة، بل بيعني إنك جربت وغامرت وحبيت وانحبيت وتجرأت تعترف إنه هاد الحب انتهى، وهاد أكيد أحسن من إنك تعيش حياتك وحيد في جفاف عاطفي منتظراً الشخص المثالي، أو تعيش حياة تعيسة مع شخص فقدت التواصل معاه عشان ترضي مجتمع مختل ومنظومة مختلة لا تناسب العصر اللي احنا عايشين فيه بقدر ما قد تناسب أوروبا في العصور الوسطى
بالنهاية براد بيت طلع واحد وسخ وعينه فارغة، وما أتيس من جنيفر أنستون اللي خانها مع أنجلينا إلا أنجلينا اللي خانها مع ماريون كوتيار، وواضح إنه حياتهم مليئة بالقذارة وفخار يكسر بعضه، بس في النهاية ما بتقدر تقول إنه زواج 12 سنة راح بالزبالة، ولا إنه النظرة اللي كان يطلعها عليها كذب، عادي يكون في إشي حلو وينتهي بدون ما يثبت أو ينفي أي نظريات
ملاحظة: في فرق بين الشخص اللي شايف إنك ممكن تستمر معاه بس حاطط احتمال الانفصال من باب الواقعية، وشخص واضح من البداية إنه مش رح تتحمل تكمل معاه، هاي اسمها تياسة، فاقتضى التنبيه

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s