“لم يحدث شيء مهم اليوم”

في بداية 2017 قررت أعمل شغلة من باب التغيير والتفاؤل، أعبي نص الكاسة المليان إن صح التعبير. قررت أجيب دفتر أكتب في كل يوم إشي منيح صار أو فكرة كويسة. شو ما كان ومهما كان اليوم سيئ. يعني حتى لو نيزك ضرب الأرض وماتوا نص سكان الكوكب كنت رح أكتب: اليوم نجا نصف سكان الأرض. وكوني ما لقيت دفتر صغير واحد ب360 صفحة وقتها جبت أربع دفاتر صغار قسمتهم
على أشهر السنة، واليوم سكرت آخر صفحة في آخر دفتر، وحان وقت التقليب في اللي كتبته على طول السنة
IMG_20171231_235045.jpg
بين الصفحات لقيت أيام مدحش فيها أحداث حلوة، وأيام فش فيها إشي خارج عن المألوف غير إني أكلت تمرية مثلًا. لكن بمجرد ما أفتح الصفحة وأقرأ مثلًا إنه في اليوم الفلاني خلصت ترتيب غرفتي الجديدة، أو شفت فلان أو زارتني فلانة، أو خلصت مسودة الرواية الأولية، أو شلت التقويم، أو رحت حجزت تذاكر سفر، أو أخدت بنات أختي مشوار أكلنا بوظة، لقيت حالي ببتسم والابتسامة بتعرض وبتعرض وشوي شوي حسيت قلبي عم بتحول لقلب حب من الفرو الصناعي زي اللي ببيعوهم محلات الورد في الفالنتاين… رغم إنه في بعض الحالات كنت أقرأ الحدث الحلو وأتذكر إشي سيئ صار بنفس اليوم، بس الإشي السيئ مش مكتوب، والتاريخ يحفظ ما نختار أن نكتبه
في قصة منسوبة للملك جورج الثالث اللي حكم بريطانيا في فترة من القرن الثامن عشر، بتقول إنه تم العثورعلى مذكراته وكان كاتب فيها يوم الرابع من يوليو 1776: “لم يحدث شيء مهم اليوم”. وهو نفس اليوم اللي استقلت فيه الولايات المتحدة عن بريطانيا. للأسف القصة مش صحيحة والملك جورج الثالث ما كان عنده دفتر مذكرات، لكن العبرة منها واضحة وما بدها شرح
إجمالًا كانت سنة طويلة، وفي أشياء صارت أول السنة حاسيتها صارت زمان كتير، وفي أشياء نسيتها تمامًا، لكن يمكن أحسن إشي بفكرة التدوين اليومي هي إنك تعرف آخر السنة إنه مش كل الأيام بتشبه بعض ولو بدت كذلك، وإنك إذا حسيت إنه فعلًا كل أيامك شبه بعض ممكن تعتبره تحذير عشان تغير الوضع عالسنة الجديدة
كل سنة وأيامكم سلطة مفعمة بالألوان والنكهات والروائح والمشاعر المختلفة والمتجددة
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s