35

ملاحظة: نشر هذا البوست أصلًا يوم 1-9، يوم عيد ميلادي، ولم أنشره على المدونة، وقمت بنشره متأخرًا الآن لأغراض التوثيق

شو يعني 35؟

يعني الشعور الصغير بالانتصار وانت بتعبي فورم التأمين وبتحط “صح” على المربع تبع من 30-34 رح يروح لصالح الشعور بالغبن إنك هلأ مضطر تنضم للفئة ما بين 35 و40 وتدفع أكتر. بس مش مهم تدفع أكتر، المهم إنك بلشت تنحط مع الأربعين بخانة واحدة، والخطر مضاعف إذا إنت شخص أصلاً مخه بيشتغل بأسلوب التدوير لأقرب منزلة عشرية، يعني الـ35 قرش عندك نص دينار، أسهل للحسبة، بس من يوم وطالع لازم تعود حالك تبطل هالعادة الوسخة، 35 يعني 35، رجعلي الباقي، وصاحب الدكانة مش معترض بس إنت فجأة بتصير تصرخ: “بس خمس سنين فرق كبير!” وبتنهار على فريزر البوظة ولا ستاند الشيبس، بقوم هو بذكاؤه بفهم إنه الموضوع مش موضوع مصاري وبيعطيك شلن وبطبطب على راسك وبروحك عالبيت

35 يعني رح تمر عليك فرص كتير بتقول ليش لأ، بقدملها، بعدين بتتفاجأ إنك خارج الفئة العمرية المستهدفة. طب يا جماعة أنا عمري 35 بس حاسس حالي عشرين وهي كلها مسابقة قصة قصيرة ارحموا حالكم، أساسًا ما أنا عارف مش رح أفوز يا حوش يا حثالة المجتمع الدولي ولا رح تطلعلي المنحة وأصلًا إنتوا يا إما مطبعين يا جماعة USAID، معروفة، أبو منحكم لأبو جوائزكم

35 بالعرف المجتمعي يعني العمر اللي بتنتهي عنده حياتك كبنت (زمان كان 30 بس مع التضخم وتقدم الطب رفعولنا إياه لل35)، طب يا اولاد الأوادم ارسولكم على بر، يا بنلغي الصورة النمطية وبنعمل تعزيز وتمكين وبصير مجرد رقم يا إما بتختمولنا شهادات انتهاء صلاحية وبتعطونا تقاعد مبكر وبنروح بنعيش حياتنا وبنلف العالم. بس مضطرة أعترف إنه الصورة النمطية عم تتلاشى، بس أنا بفضل التقاعد المبكر والوحدة بصحتها، فمعًا لإعادة إحياء التراث

35 يعني عشت فترة لا بأس بها على هذه الأرض، وإذا كنت رح تعيش لمتوسط العمر المتوقع فيعني رح تعيش زيهم، من جهة بتحسهم كتير إنه أوف لسا بدي أعيد من أول وجديد، ومن جهة بتحس إنهم بمرقوا بسرعة البرق، لأنه 2009 كانت قبل عشر سنين يا إخوان مالنا. عشر سنين! لا وممكن الله يعطيك الصحة والعمر وتمد معك للتمانين ولا التسعين، ومش رح أذكرك إنه ممكن عمرك ينقصف على بكير عشان عيد ميلادي وحابة أكون متفائلة بس إنت تذكرت لحالك

وكونها 35 مش مدة قليلة بتصير تنتبه إنه قيمة السنة بتزيد مع العمر، وإنه اللي تعلمته بسنة عن عشر سنين من أيام زمان، وإنك بتنضج بالتجربة أكتر من العمر. وبتشوف ناس أشكال ألوان، ناس أحسن مما تصورت فبتعرف إنه الدنيا لسا بخير وناس أوطى مما تصورت فبتعرف إنه الحذر إجباري

يمكن أهم إشي تعلمته شخصيًا هو إنك إذا كنت شخص كويس أو عالأقل بتحاول تكون كويس فتأكد إنك حتى لو دخلت بدوامات وانحطيت بمواقف سيئة ولو باختيارك فالعناية الإلهية وعقلك وتربيتك مش رح يخلوك تنجر فيها للأبد، بتنسحب منها بالنهاية. هلأ إذا لقيت حالك مهور ومكمل باختيارك في وضع سيء أو مهين لنفسك واحترامك هون لازم توقف وقفة مع نفسك، هل إنت عم بتعاقب بحالك؟ هل إنت شايف حالك شخص بلا قيمة؟ شخص لا يستحق؟ هل أنت غبي بحيث تضل قاعد تسمع أسطوانة مشروخة بتعيد نفسها بنشاز مقزز ومستني تطلعلك فجأة ألحان محمد عبد الوهاب؟ اللي بدي أقوله إنك حوالي هذا العمر بتعرف قيمة نفسك وقيمة الوقت، وأهم إشي تتعلمه من الأسطوانات المشروخة إنك إنت نفسك ما تكون أسطوانة مشروخة، عشان ما تلاقي حالك يومًا ما عمرك أربعين ولا خمسين سنة وما قدرت تحقق أي نجاح حقيقي (ومليون خط تحت حقيقي) ولا عرفت تكوّن علاقة سوية، ممكن حتى تتجوز وتجيب اولاد بس علاقتك فيهم تكون مختلة، أو اشتغلت كتير وطلعت مصاري كتير بس ماعملت فيها ولا إشي يعطي لحياتك قيمة حقيقية

شيء آخر تعلمته إنه لا تأجل سعادتك لأي سبب، حتى في الأشياء البسيطة. اشتريت بلوزة جديدة البسها لا تستنى طلعة محرزة. صحلك تسافر هلأ سافر ولو ما لقيت حدا يروح معك – في حال كان ظرفك الاجتماعي يسمح بذلك- وبالمرة تمردي على الظروف الاجتماعية غير المنطقية خاصة إذا كنتِ بنت عزباء فوق التلاتين، لأنه متى ما سمحت للناس يتحكموا فيكي رح تعيشي حياتهم، والعمر قصير وبكفي قمع وحرمان من مسرات الحياة البريئة المباحة العادية، وخففوا سكريات بس كلوا كيك باعتدال لأنه الحياة صعبة بدون كيك، واشربوا شاي كتير، واسمعوا كاظم الساهر قبل ما هو التاني يطلع سيساوي ولا شبيح ولا بخون مرته ونبطل نسمعله بضمير مرتاح

وأيلول مبارك عالجميع

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s